SGM Diony Cañete midayeg sa Hungary sa malampusong 2014 WEKAF tourney
CEBU, Philippines- Gidayeg ni Supreme Grandmaster Dionisio ‘Diony’ Cañete ang Hungary tungod sa ilang malampusong pagpahigayon sa 2014 WEKAF Championships.
Ang biennial gathering sa mga maayong laking eskrimadors sa tibuok kalibotan gipahigayon niadtong Hulyo 23-27 didto sa Debrecen, ikaduha sa labing dakung siyudad sa Hungary sunod sa Budapest.
“My hats off to the organizers of the WEKAF Championships recently in Debrecen, Hungary. It was a well-organized, very successful tournament,” matud pa ni SGM Cañete, kinsa maoy guest of honor atol sa lima ka adlaw nga torneyo.
Ang Hungary usa lang sa pipila ka mga nasud nga gihatagan og katungod sa pagpahigayon sa maong prestihiyosong kalihukan. Ang lain pang mga nasud mao ang Mexico, England ug ang United States.
Didto sa Debrecen, si SGM Cañete, ang founder ug president emeritus sa World Eskrima Kali Arnis Federation, naimpres sa labing modernong computer scoring system nga gigamit sa organizing Hungarian Doce Pares Eskrima ubos sa liderato ni Master Ferenc Danko.
“Upon knowing that eskrima traces it roots in Cebu, the mayor personally told me that he wants Debrecen to establish a sister-city relationship with our beloved city. Maybe within a week or two, I’m going to meet with Cebu City Mayor Mike Rama to take up that matter,” matud pa ni SGM Cañete, kinsa gituboy ngadto sa Order of Datu Lapu-Lapu duha na ka tuig ang nilabay. Ang ODL maoy labing taas nga award sa tanang eskrima master nga madawat sa tibuok kinabuhi.
Gawas pagtambong sa WEKAF World Championships, si SGM Cañete uban ni Grandmaster Percival ‘Val’ Pableo, usa sa iyang labing masidlakong tinun-an, mipahigayon og mga training ug seminars sa Uropa lakip na ang Italy, France, Germany ug United Kingdom. (BANAT NEWS)
- Latest
