UV Lancers batok Veteran Lancers

CEBU, Philippines - Agi’g pagpangandam sa 14th Season sa Cebu Schools Athletic Foundation, Inc. (CESAFI), ang defending champion University of the Visayas (UV) Green Lancers mopahigayon og usa ka tune-up game  batok sa Veteran Lancers karong alas-3 sa hapon diha sa UV gym.

Ang tune-up game usa ka paagi aron makita sa UV community kun unsa kaandam ang mga batan-ong Lancers sa pagdepensa sa ilang korona nga maoy ikanapulo nilang titulo sa CESAFI.

Ang batan-ong Lancers makigsangka sa mga beteranong Lancers nga gilangkuban og pipila ka mga kanhi PBA players sama nilang Bruce Dacia, Stephen Padilla, Reed Friar Juntilla, Rene Saycon, Jerome Silva, Edrian Lao, Harold Cincoflores, Salvador Pagasian, Ritchum Dennison, Michael Luga, Eman Calo, Mark Ababon ug ang PBA-bound ug kanhi UV Baby Lancers Brian Quinton Heruela, kinsa sakop na karon sa UC Webmasters.

Sa preliminary game ang Lancers coaching staff sa pagpangulo ni head coach Felix ‘Donbel’ Belano Jr. uban ni UV Athletic Director ug Cebu First District Representative Samsam Gullas makigsangka batok sa College of Criminology Selection.

Ang UV Green Lancers mosugod sa ilang title defense karong Domingo batok sa Cebu Institute of Technology-University (CIT-U) Wildcats diha sa Cebu Coliseum.

Ang 14th season sa  CESAFI buksan karong  Sabado diha gihapon sa Cebu Coliseum. (BANAT NEWS)