Ireklamo ninyo

Makadaghan na ko nga nakasulod sa Barangay Pasil, dinhi sa dakbayan sa Sugbo ug mahulagway nako nga “gubot” kaayo ang maong lugar. Sa karsada pa lang gani, makita na nimo ang nagkaguliyang nga sitwasyon nga halos dili makairog ang mga sakyanan.

Ngano man nga naingon niini ang sitwasyon? Tungod kay naghalhal lang ang mga opisyal nga mura’g dili makamao sa ilang trabaho. Wala sila’y panglantaw nga monindot ug mahapsay ang ilang dapit. Ang mga tawo nga nagpuyo daplin sa karsada gitugotan ra sa mga opisyal nga mipalapad sa ilang panimalay ngadto sa karsada.

Husto ba gud na? Ayaw gyud mo pagpatuga-tuga og lansar og katungdanan sa kagamhanan kon wala kamo’y political will, nagpasabot nga kuwang ang inyong kaisog nga mopatuman sa mga lagda. Gamita gud ninyo ang inyong mga utok. Siyaro, wala kamo makakita nga ang daplin sa karsada giparkingan og mga trisikad?

Dunay mga tindahan nga anaa na gitukod sa dapit nga agianan unta sa mga tawo, unya nagbutang pa gyud og lamesa atubangan sa tindahan nga daan na nga milapas ngadto sa karsada? Unya wala makakita niini ang mga opisyal sa barangay? Mao kini ang problema kon ang gipili nga mga opisyal mokangkang lang ang kamot kon mokobra sa ilang honorarium.

Tiaw mo nga dihang misulod ko sa Pasil pipila ka buwan ang nakalabay, nakita nako nga duna gyu’y karsada nga wala ko makaagi kay giparkingan ang masi’g ka atbang sa karsada. Sa sudlunon nga bahin, ang kabalayan nag-iyahay lang sa pagsiguro kon kinsa ang makabentaha.

Karon nga nasunog na ang maong dapit, balik sa uno. Lipay ko niini, kay matud ni Nagiel Bañacia, ang pangulo sa City Disaster Risk Reduction Management Office, ibalik nila ang karaang sukod sa mga luna diha nga giaprobahan kaniadtong 1972 ang Slum Improvement and Resettlement (SIR) project atol sa termino ni kanhi mayor Florentino Solon.

Makaingon ko nga ang mga nasunogan diha sa Pasil mao ra usab ang mabasol kay wala sila’y gihimo batok sa mga abusado nga nagpuyo daplin sa karsada. Karon, pangutan-on nako ang mga nagpuyo sa kasikbit nga Barangay Suba, gusto ba kamo nga ang nahitabo sa Pasil, mahitabo usab diha sa inyong lugar?

Pwerteng gubota usab sa Suba. Kon may ilegal didto sa Pasil, labaw pa nga may mga ilegal diha sa Suba. Kamong mga buotang lumolupyo sa Suba, aghata ninyo ang inyong mga opisyal nga molihok na sila aron hawanan ang inyong karsada.

Kini aron nga ang mga bombero dali nga makaresponde kon mahitabo nga may sunog.