Rain or shine, devotion

Mao kini ang atong nasaksihan sa nagpadayon nga Novena-Masses sa Pilgrim Center sa Basilica del Santo Niño alang sa kapiyestahan sa Balaang Bata. Tiunay nga devotion, kay mag-uwan man o mag-init, either before and after the Holy Mass, o sa panahon gayud sa Santos nga Misa.

Dili gayud mabungkag ang katawhan. Sulod sa Pilgrim Center, payong na ang makita. Sa ato pa, matang kini sa devotion nga wala mag-agad sa panahon.

Ug bisan pa sa ka kadaotan sa panahon, wala gayud mokibra ang gidaghanon sa mga devotees nga motambong sa mga Novena-Masses, kay matud pa, kinahanglan kompletuhon gyud ang siyam ka adlaw.

Wala’y palta, aron mahingpit ang atong mga pag-ampo ug adunay dakong kahigayonan nga makaani kita sa mga spiritual benefits sa nobenaryo. Ug niining gibag-o nga sistema paghatag og tumang kasayon sa manimbahay, pinaagi sa pagbuwag sa agianan pagsulod ug paggawas sa Pilgrim Center, OK kaayo alang kanako.

Hinoon, ang entrance medyo nakahatag og kahasol, apan, gihimo na kini nga dugang sakripisyo ug pagpahugot sa devotion ngadto ni Santo Niño.

Ug kining pag-ingon sa “announcer” sa dili pa ang last blessing nga: “Manglingkod kadtong adunay kalingkoran,” wala na ni kinahanglana tungod kay ang-ang kon molingkod ka, kon wala’y kalingkoran. Maayo man gani nga inigpanindog na, dili sila moingon nga “manindog kadtong nanglingkod.”

* * *

Nindot kaayo ang design sa mga Sinulog T-shirts. Believe ko sa mga artists niini. Ang nakadaot lang kay ang uban nga mga design wala’y labot ang Santo Niño ... kon dili, ang ilang gi-depict mao ang mga maskara sa Ati-Atihan ug Dinagyang sa Negros.

Atong hangyoon ang mga artist ug designer sa Sinulog T-shirts nga iniggamit nila sa ilang imagination, dili nila wanihon ang sentro sa kasaulogan nga mao ang Santo Niño de Cebu, nga ang Sinulog dili Ati-Atihan ug dili Dinagyang.

Ug midason kita sa tinguha ug katuyoan ni Mayor Tomas Osmeña nga ang Sinulog festivities dili himoong okasyon sa pagkiat-kiat, kay lagi dili kini Mardi gras, dili carnival.

Maghimo na lang unya ta’g laing kalihokan sa pagkiat-kiat ug paghuboghubog. Tingali sa City Charter Day, o All Souls Day, o sa Independence Day. Sa America dakong kasaulogan ang ilang Fourth of July. Dinhi sa ato, mingaw ang atong Adlaw sa Kaugalingnan. Tingali tungod kay economically ug financially, wala nato maangkon ang hingpit nga kagawasan.

Ulipon gihapon kita sa World Bank, IMF, ADB, ug mga finanicial institutions sa Japan, Europe, ug karong bag-o sa China ug Russia.