Gilamat kuno

Napalgan na ang patay’ng lawas sa duha ka babaye nga unang na-missing sa hunasan sa Barangay Buaya, dakbayan sa Lapu-Lapu niadtong nakalabay’ng semana.

Apan didto na kini makit-i sa Albuera Leyte nga hilabihan na ka layo sa gipadparan sa mga lawas sa duha.

Ang naasoy’ng mga babaye pulos estranyo sa dapit ug una nga higayon sila nga nanginhas sa naasoy nga baybayon sa Barangay Buaya.

Naabtan sila sa kusog nga unos ug nangaratol kay hilabihan ka kusog sa ulan dungan sa hapak sa hangin diin wala na sila’y makita, o zero visibility.

Naratol sila ug nanagan. Bugtong timailhan nila nga rumbohon mao ang building sa direksyon sa Punta Engaño, apan padulong diay kadto sa kantilado nga dapit ug didto sila naunlod.

Ang duha nila ka kauban naluwas kay medyo kahibawo man mokapakapa. Sumala sa mga survivor nga taga kiting ra man kuno ang tubig nga ilang nahimutangan, ug kon wala sila mopahawa didto dili mahitabo ang disgrasya.

Samtang gitug-an sa uban nga mga tawo sa mao nga dapit, nga hilabihan kuno ka saba ang naasoy’ng mga babaye kinsa nagsige og kuha’g hulagway sa mga agukoy dungan sa pagpangatawa sa wala pa ang unos moabot.

Nagtuo ang mga lumad sa dapit nga basin og gimino ang mga biktima, sanglit notado ang dapit nga hilan kaayo ug daghan na ang gipangkuha.

Gani duna’y estorya nga nakakita kuno ang mga babaye og balay sa tunga sa dagat, taliwala sa naghaguros nga unos.

Nagtuo ang uban nga basin lamat ra kadto ug didto nakapaingon ang duha.

Tinuod man o dili ang lamat, o mino, mas maayo nga mag-amping na lang g’yud kon moadto sa dapit nga adunay tubig, aron dili madisgrasya.