Gipanid-an kanunay

Nalipay ko nga nagtan-aw sa giaspalto nga karsada sa Fuente Osmeña rotunda kay akong nakita nga gisapawan g’yud sa kontraktor ang una nilang giyabo. Mas maayo kay nakabantay sila nga adunay nagpaniid kon giunsa nila sa pagtrabaho ang proyekto nga gisalig kanila.

Apan ang akong nabantayan nga wala pa maapil pag-aspalto ang kabahin sa karsada atubangan sa dakong hotel. Sagdi lang, susihon man unya nato kon maningil ba sila og bayad sa pag-aspalto sa karsada nga wala nila trabahoa nga maoy pagduda sa uban.

Ang kabahin gud sa karsada atubangan sa Rajah Park Hotel nindot pa man g’yud kaayo. Aw, bisan kadtong ubang parte sa karsada nga gikaskas nila, nindot pa man, apan giaspalto lang g’yud kay daghan man lagi og kuwarta ang DPWH gikan sa nasudnong kagamhanan.

Mas nindot g’yud lagi unta kon ang naghinubra nga kuwarta sa DPWH, gigamit nila sa pagbayad sa mga yuta alang sa road expansion project. Ang taytayan sa Mambaling, dugay na kaayong katuigan nga gipalapdan, apan wala kapahimusli kay ang karsada gamay pa gihapon.

Motabang na lang unta sila pagpalapad sa mga karsada ug dili kay kadto ra g’yud nga gideklarar nga national road maoy ilang atimanon. Bisan gani ang mga national road wala man nila maatiman.

Nakakita ba sila sa Arellano Boulevard unahan sa Coast Guard headquarters? Kay wala man maatiman, kaniadto migamay pag-ayo ang karsada, kay gipuy-an na sa mga tawo. Karon, miluagluag pagbalik, apan wala gihapon maatiman pag-ayo.

Pun-an pa nga ang mga sakop sa City Hall clearing team nagmika lang ug wala maghikutar sa ilang trabaho, gubot kaayo ang maong karsada ug walay nangagi nga sakyanan sa maong dapit kay mahadlok nga makaligis sila’g mga bata nga anaa sa karsada nagduwa.

* * *

Dili malalis nga dako g’yud kaayo og natabang ang mga sakop sa Task Force Alpha (TFA) sa pagpatunhay sa trapiko dinhi sa dakbayan. Ang kapin sa 50 ka aktibong mga sakop niini, matag hapon hangtud na sa gabii, moserbisyo nga libre sa pag-abag nga mamenos ang problema sa trapiko.

Kini gani ang rason nga pinangga kaayo ni Mayor Tomas Osmeña ang mga sakop sa TFA. Tungod niini, dunay mga tawo nga gusto nilang dauton ang TFA. Pastilan, ang mga tawo nga miserbisyo nga libre, para sa siyudad, gusto pa ninyong dauton?

Nakaila ko sa “mastermind” niining mao nga tinguha nga dauton ang TFA. Porbida niining tawhana, siya sa iyang bahin, ambot og moserbisyo ba kini nga wala’y bayad. Dasigon pa nako ang mga TFA sa pagpadayon sa makugihon ninyo nga serbisyo!