Promise vs. Expectation vs. Reality

Karong adlawa ang ikaduhang State of the Nation Address (SONA) ni Presidente Duterte nga ipahigayon alas 4 karong hapon didto  sa Batasang Pambansa. Kumusta naman ang nahaunang gipangsaad ni Duterte sa iyang unang SONA, ilabi na ang pagsumpo sa ilegal nga drugas ug sa naghitak nga kurapsyon? Asa na kita karon?

Ang saad, expectation ug ang reyalidad, dako ra kaayo og kalainan. Ingon niini ang nahitabo sa pagdala sa renda sa pangagamhanan ni Digong diin napamatud-an na nga dili sayon ang iyang biyahe ug sa pagtimon kon asa ang direksyon sa atong padulngan. Daghang unos ug bagyo ang iyang nasugatan hinungdan nga dili malikayan nga nalangan o nababagan g’yud ang gitinguha nga pagpatuman unta sa reporma sa nasud.

Sukad pa sa kampanya hangtud nga nanumpa na sa katungdanan, ang problema sa ilegal nga drugas ang gihatagan ni Duterte og numero uno nga pagtagad. Gani, mihatag pa kini og unom ka buwan nga tagal aron hingpit nga masumpo ang problema sa illegal drugs, apan gusto man ni Duterte nga mahatagan dayon kini og katumanan wala g’yud siya’y mahimo kay nakagamot na pag-ayo ang problema nga lisud na ibton. Samot na ang suliran sa kurapsyon, sanglit nakapilit na kini sa sistema sa mga notadong kawani ug mga opisyal sa gobiyerno nga padayong mihimo sa ilang panguwarta. Dakong hagit ang giatubang karon nga kagubot didto sa Marawi City nga bisan og gipaubos na sa martial law ang Mindanao wala pa gihapon masumpo ang Maute group.

Laing labad sa ulo mao ang New People’s Army (NPA) nga bag-ohay lang nangambus sa kapolisan sa Negros Oriental didto sa Guihulngan City. Sila ang gibaharan sa presidente nga isunod sa pag- puhag human sa Maute. Wala man matuman ang nahaunang saad ni Presidente Duterte, apan nakita nato kon unsa siya ka seryuso sa pagpuo sa mga sagbot sa iyang panggobiyerno. Atong atangan ang unod sa ikaduhang SONA sa pangulo.