EDITORYAL - Balik uno na pud

Basta magpabiling dili magkasinabot ang mga rebeldeng New People’s Army ug ang gobiyerno, dili g’yud matapos kining lima na ka dekadang insurhensiya sa mga komunista nga nikalas na og kaliboan ka kinabuhi. Ang Communist Party of the Philippines - NPA-National Democratic Front, kinahanglang mopakita og seryusong mga lakang kon tinud-anay ang ilang tinguha nga matapos na kining kagubot pinaagi sa pagpahilom sa ilang mga armas.

Lisud kaayong tuohan nga gusto sila og kalinaw kon ingon niini nga magsige lang gihapon ang kumbate sa mga hilit-hilit nga dapit sa nasud. Kon tan-awon, ang tanang dapit sa nasud iya sa katawhan, sa gobiyerno ug bisan sa mga rebelde. Apan ang tulo, kinahanglang motuman sa balaod nga gitahod sa kinabag-an, ug dili sa balaod sa ilang tagsa-tagsa ka pundok.

Nagpasabot kini nga dili mahimo nga ang militar maghawod-hawod ug mangyatak sa katungod sa katawhan. Sa samang paagi, dili pwedeng moinsister ang NPA nga sila maoy hawod sa tanan pinaagi sa pagpatay sa mga sibilyan, pagpanghasi sa mga kompaniya ug pagpamanhig sa mga tropa sa gobiyerno aron iinsister ang ilang kawsa. Husto kining pagbiya ni Duterte sa negosasyon, kay dili man mahimo nga makig-estorya og kalinaw nga magsige ka og panglingi sa luyo.

Sa pagkakaron, gihimo sa gobiyerno ug pipila ka lider sa mga komunista nga makahulma og mga lagda nga kinahanglang sundon sa isi’g ka habig isip paagi aron makapahimutang sila sa ilang mga hunahuna. Paagi usab kining mga initial talks, backchannel negotiations aron palig-unon ang pagsalig sa usa’g-usa nga ang sentro mao ang kalinaw ug pagkoriher sa mga inhustisya nga nahimo kaniadto sa duha ka habig.

Apan kon ingon niini nga ang usa’g-usa moinsister bisan nakahibalo na sila nga makaapektar kini sa negosasyon, bisan kinsa pa’y presidente nga molingkod, dili g’yud makab-ot ang kalinaw ug magsige lang og balik sa uno.