EDITORYAL - Dakong palpak

Ang pagkasayop ni Presidente Rodrigo Duterte sa pagbutyag nga ang kanhi gobernador sa Pangasinan nalambigit sa ilegal nga drugas, nakapaturok karon og pagduda sa katinuoran sa uban pa niya nga report.

Nangayo man tuod og pasaylo si Duterte pero human na niya naanunsyo sa publiko ang ngalan ni Amado Espino ug naulawan na ang kanhi gobernador nga karon kongresista na.

Ang kadagkoan sa Malacañang nangangkon nga gibalik-balik nila pag-validate ang report kabahin sa mga tawo nga gitumbok nga nalambigit o kaha protektor sa mga drug lord, sa dili pa ipabasa sa presidente.

Dili diay imposible nga kadtong uban sa mga ngalan nga gianunsyo ni Duterte sa nanglabay’ng mga adlaw, wala sa’y basehanan ug mugna lang sa mga sayop nga report gikan sa iyang mga sinaligan?

Hinoon, nakabantay na man ang publiko nga bisan gani sa mga ngalan ug sa mga katungdanan nga gihuptan sa pipila ka opisyal dili tukma mao nga kadudahan usab ang report.

Tiaw mo nga hasta ang mga opisyal nga dugay na kaayong namatay giapil pa sa report ni Duterte nga kuno nalambigit sa ilegal nga drugas. Husto ang kadagkoan sa Commission on Human Rights (CHR) sa pag-ingon nga kinahanglang hashasan gayud unta pag-ayo ang mga report.

Kinahanglan unta nga human kini ibulgar sa presidente ngadto sa publiko ug pasanginlan nga sila nalambigit sa ilegal nga drugas pasakaan dayon sila og kaso sa hukmanan ug dili kay gub-on lang ang ilang dungog.

Dili imposible nga ang miangkong drug lord nga nitahan na sa kapolisan manimalos sa mga polis nga migukod pag-ayo sa iyang ilegal nga kalihukan ug butang-butangan kini og report nga magdawatan og payola.

Angay’ng hunahunaon ni Duterte nga dili sayon kun siya ang mahimutang sa puwesto sa mga gipasanginlan bisan og walay basehanan, kay ang tibuok pamilya niini mauwawan.