Nagsige’g ka-late sa trabaho

Dear Atty. Divine,

Nagtrabaho ko sa usa ka kompaniya sud na sa lima ka tuig. Karong bag-o nakadawat ko og Memorandum gikan sa HR gumikan kuno sa akong kanunay nga pagka-late sa trabaho. Mibalhin man gud mi og puyo nga medyo layo sa akong trabahoan, hinungdan nga ma-late ko usahay ilabi na kun traffic kaayo. Ikaduha na kini nako nga pagkadawat og memo labot sa akong pagka-late sa trabaho. Ang akong pangutana, mahimo ba kini nga kabasehan sa akong kompaniya pag-terminate kanako? Unsa may akong buhaton kun ugaling ila ko nga taktakon? Daghang salamat. — Lovely

 Dear Lovely,

Kun nalatid sa imong Employment Contract or sa inyong Company Rules and Policy nga i-terminate ka kun kanunay ka nga ma-late sa trabaho, then mahimo kini nga basehan sa imong kompaniya or employer sa pag-terminate kanimo. Apan kun wa kini malatid sa imong employment contract or Company Rules and Policy, ang provision sa Labor Code posibleng maoy ilang basehan sa pag-terminate kanimo ilabi na ang Article 282 (b) nga diin gilatid sa maong provision ang kalabot sa “employee’s gross and habitual neglect of his duties as a ground for termination.”

Sa ato pa, kun ang empleyado nagpabaya sa iyang trabaho pinaagi sa kanunay nga pagka-late, mahimo kini nilang i-terminate apan kinahanglan nga mosunod sila sa due process pinaagi sa pag-imbestigar ug paghatag og higayon sa empleyado nga makatubag sa pasangil ug sa pagpahibawo sa employee sa resulta sa ilang imbestigasyon. Kun kaduha pa lang kini nahitabo, posible nga warning or suspension ang silot nimo. Apan kun ila gyud ka nga taktakon mahimo ka nga mopasaka og reklamo ngadto sa NLRC ug sila na ang modesisyon kun legal ba ang pagkataktak kanimo. Thanks and God Bless. - Atty. Divine

 Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.