Ang BFP 25 ka tuig na

Saulogon sa kabomberohan karong Martes, Agosto 2, ang ika-25 ka tuig nga sumad sa iyang pagkamugna pinaagi sa Republic Act 6975, ang DILG Act of 1990 nga ni-took effect kaniadtong 1991.

Sa wala pa ang maong balaod, ang kabomberohan ubos pa kaniadto sa PC/INP. Ang Bureau of Fire Protection maoy ahensiya nga gitahasan pagsiguro sa public safety pinaagi sa paghimo og mga programa sa fire prevention ug pagresponde sa mga sunog.

Mao pud kini ang ahensiya nga mopatuman sa mga lagda nga nalatid sa Fire Code of the Philippines ug mo-conduct og investigation involving fire incidents ug pagsuta sa hinungdan sa sunog ug mopasaka og kasong arson kun mamatud-an nga kini tinuyo.

Taas na og naabtan ang atong kabomberohan apan makita gihapon nato ang kakuwang sa kahimanan sama sa fire trucks, personal protective equipment ug uban pa.

Apan bisan pa man sa maong kakuwang, wala kini makapaluya sa kabomberohan, hinoon gihimo kining usa ka dakong hagit kun unsaon pagpaigo sa mga limitadong kahimanan nga anaa kanila.

Tanang alarma sa sunog among tubagon. Among obligasyon ug responsibilidad ang pagresponde sa matag tawag ninyo kanamo. Usa ka dakong kalamboan karon sa BFP mao ang pag-apil sa among ahensiya sa gitukod ni Presidente Rodrigo Duterte nga Emergency 911 nga unang gipatuman didto sa dakbayan sa Davao ug karon ipatuman na sa tibuok nasud.

Naglaum kami nga sa pag-apil na sa BFP sa Emergency 911 basin og masulbad na ang panginahanglan sa dugang kahimanan. Paningkamotan nga ma-operational na ang Emergency Hotline 911 karong Lunes ug bukas ang mga linya niini 24/7.

* * *

Pormal na nga selyohan ang kasabutan sa BFP-Region 7 pinaagi sa among regional director Senior Supt Esmael Codilla ug sa lungsod sa Tuburan, Cebu pinaagi ni Mayor Democrito Diamante.

Andam na ang duha ka ektaryang luna nga ihatag sa lungsod aron katukoran sa labing unang rehiyonal nga National Fire Training Institute. Pagka karon, usa ra ang training center sa atong kabomberohan ug tua kini mahimutang sa Canlubang, Laguna.

Kun matukod na ang extension nga training center dako kaayo kini og ikatabang sa atong mga fire personnel nga taga Visayas ug Mindanao.