EDITORYAL - Tambutso nga saba puohon

Dalaygon kaayo kining gipasiugdahang kampanya sa kagamhanan nga pangsakmiton ang mga saba kaayong tambutso sa mga motorsiklo nga alingugngog kaayo sa atong pangdungog.

Dili makabasol ang mga tag-iya sa motorsiklo kun tangtangan kini og mga tambutso sa mga traffic enforcers kay bisan sila makamatuod nga hilabihan kasaba sa tambutso sa ilang sakyanan.

Daghang mga lumolupyo kang kansang kabalayan nahimutang daplin sa karsada nga usahay takulahaw lang makatimbakuwas gikan sa ilang paghinanok tungod sa kasaba sa mga tambutso sa motorsiklo.

Unsaon man gud nga daghang motorista, ilabi na ang mga batan-on, tuyoon gyud nila pagtaod og saba nga tambutso sa ilang mga motorsiklo kay ang uban manghinambog ug ang uban nagtuo nga mokusog ang dagan sa ilang motor kun walay silencer nga itaod.

Wala nila huna-hunaa nga sa ilang gihimo nakahatag sila og kahasol sa uban. Dili sila makabasol nga adunay mga subdivision nga dili mopasulod og motorsiklo nga saba kaayo og tambutso aron dili makatugaw sa pagpahuway sa mga lumolupyo.

Anugon na kaayo ang P500 nga multa kun anhi sila madakpi sa dakbayan sa Sugbo, walay labot nga sakmiton pa ang ilang tambutso nga saba.

Angay nga estriktohon pag-ayo ang pagpatuman sa kampanya batok sa mga saba kaayo nga tambutso, ilabi na ngadto sa mga motorsiklo nga gipapitlan og mga stickers nga Duterte.

Kun ang mga dumadapig ni President-elect Rodrigo Duterte tinuod nga nangandoy og kausaban, dili sila angay’ng mohimo og mga supak sa balaod.

Kinahanglan nga atol sa administrasyon ni Duterte mandoan niya ang mga road law enforcers nga sakop sa Land Transportation Office (LTO) aron paspasan pa nila ang paghimo og kampanya aron mapuo ang mga badlungon sa kadalanan.