Tubig powered machine

Usa kini ka imbensyon sa pinoy nga si Stevenson ‘Steve’ Rejuso, sakop sa Filipino Inventor Society, nga may dako’g kapuslanan, nga tukma gayud alang sa atong panahon. Ilabi  nang maglisud na tas kamahal sa konsumo sa kuryente.  Pabor usab kini sa mga hilit nga lugar, nga wa maabti sa serbisyo sa elektrisidad. Ang gitawag nga ‘2big power’, ni Steve – mora ra ni’g lampara o suga nga butanga’g gas (kerosene) aron mosigang dagkotan ang pabilo. Ang nakalahi lang niini, ang ‘led bulb’ o pinong bombilya maoy mosiga, nga butangan  la’g tubig.

Ang nakaayo pa gyud, di ni mopili og tubig nga itubil, bisag hugaw nga tubig sa baha o kanal, tubig sa dagat, o tubig sa butong. Makapasiga ni’g ‘3-4watts led bulbs’, nga makasuga sud sa 3-4ka adlaw, nga mag-agad sa tubig nga ibutang.

Ang laing imbento ni Rejuso mao ang “Tubig Powered Machine”, nga usa ka portableng ‘DC Generator’, sama sa ‘2big Power’, nga moandar kini pinaagi lang sa pagtubil og tubig. Moprodyus ni’g kuryente, nga kun mag-‘brown-out’ o wa kay elektrisidad, mahimo ning   gamiton sa pagsuga, pag-‘recharge’ sa battery o sa celpon, pagpatingog sa ‘radio transistor’. May igo sab ning kapasidad sa pagpasuga sa mga gagmay nga komunidad, nga molungtad sud sa 2ka semana.

Managsama ra ang prinsipyo sa 2ka imbensyons. Ang pagprodyus og kuryente, reaksyons kini taliwala  sa tubig nga nagsilbing ‘electrolyte’ nga mahumol ang mga ‘metal plates’, dinhi mogana ang mga ‘electrodes’ o ‘electrical ions’. Usa ni ka direkta nga kuryente (direct current) o tinubdan sa kuryente.

Tuig 2013, pa ni gidungog nga gigamit na didto sa Brgy. Greater Lagro, QC, Metro Manila. Ambot may prodaksyons na ba kini, kay daghan na’ng nangita ini. Aduna’y nasigpatan nga buhatan nga susama ini nga didto sa Malaysia, apan matud pa, nasira na nga puno sa mga utang, tingali wa suportahe sa gobiyerno.