Ang kamahal sa palaliton makita sa kandila

Daghan karon ang nag-ingon nga naghimo na og mga nagkalainlaing pagpangandam ang mga politiko nga nagtinguha sa pagtongtong sa labing taas pa nga katungdanan sa kasamtangan karon nilang gihuptan.

Matud pa nila nga naglakip sa gihimo nilang pagpangandam mao ang pagpangita og paagi nga maduhig sa nagkadaiyang kahiwian ang mahimo nilang kaatbang sa gitinguha nilang katungdanan.

Dugang pa nila nga nalinga sila sa pag-utingkay sa mga isyu nga ilang ilambigit sa kahiwian ang ilang mahimong kaatbang daw ilang nataligam-an ang mahinungdanong panginahanglan sa kabus nga katawhan nga ilang gipasiatab nga alagaran.

Gitataw nila nga taliwala sa gikatahong pagkunhod sa presyo sa matag litro sa produktong petrolyo apan subo nga palandungon kay wala man kini makahatag og kausaban sa pagkunhod sa presyo sa mga nag-unang palaliton.

Ang bugas nga gipasiatab sa buhatan sa National Food Authority (NFA) nga abunda sa bugas ug  ang pagsulod na sa mga bulan nga mao usab ang panahon sa ting-ani apan ang matag kilo sa  bugas sa kamerkadohan  walay pagkunhod hinuon nagpadayon pa sa iyang pagsulbong.

Gitataw nila nga nalingaw kaayo ang mapagarbuhong magbabalaod sa pagkulitog sa mga gialigar nga dili maayong binuhatan sa uban nga mga opisyal sa kagamhanan apan ilang  nataligam-an ang  paghatag og unang pagtagad ang mga nag-unang panginahanglan sa katawhan nga mao ang pagsulbong sa presyo sa mga nag-unang palaliton.

Matud pa nila nga ang pagsulbong sa presyo sa mga nag-unang palaliton tataw kaayo nga atong makita niining  pagsaulog sa Adlaw sa mga Kalag sa gipalit natong  kandila  nga  ang P1 nga kandila kaniadto daw  tudlo iyang gidak-on apan karon sama na lang sa tukog nga bisan sa paghuyop  sa hangin humok na lamang  mabawog.