Mahal nga tubig

Nasabtan nako sa pamahayag sa kadagkoan sa Metro Cebu Water District (MCWD) nga dili pa sila maka-ilis sa ilang mga linya sa tubig.

Nakapahiyom ‘sab ko nga nagbasa sa report sa mantalaan nga ang kadagkoan ug mga kawani sa MCWD moinom kuno sa ilang tubig nga direkta gikan sa gripo.

Wala g’yud kuno mahitabo nga ang mga opisyal ug kawani sa MCWD mopalit og mga “bottled mineral water” kay dako sila og pagsalig nga limpyo ang ilang tubig.

Aw, kanindot ba kon kana maoy tinuod. Apan motuo kaha ka? Wala kaha mamalit og bottled water ang mga opisyal sa MCWD? Mora’g dili pa dayon ko motuo niini gawas kon makakita ko.

* * *

Kaniadto, direkta baya ko nga moinom og tubig gikan sa tubo sa MCWD. Isulod ra namo sa botelya o kaha plastik nga sudlanan, unya pabugnawon sa refrigerator.

Apan diha nga nabalhin ko pagpuyo sa bukid, nakahukom ko nga bottled water na g’yud ang imnon. Kinsa man ang dili mahadlok nga moinom sa tubig nga direkta sa linya gikan sa tubo.

Agas-pawong ang tubig sa among dapit. Sagad sa mga lumolupyo mogamit og hose aron ang tubig ibutang sa mga baril, planggana kon manglaba ug mga balde.

Diha’y higayon nga adunay nanglaba ug gibutang ang hose sa planggana aron magsigi na lang siya og pangwaswas. Nahibulong kaayo ang nanglaba kay nahubas man ang tubig sa planggana.

Pastilan, diha pa namo mahibaw-i nga kon mapawong diay ang tubig, ang tubig nga tua sa ibabaw suyopon pagbalik paingon sa ubos. Tiaw mo, ang tubig nga linaba, sagol mga buwa sa sabon, nahigop paingon sa ubang tubo sa ubos.

Kon adunay hugaw nga masuyop unya atong mainom, makamugna kini og sakit sa lawas. Dili ikalimod nga ang mga tubo sa tubig sa MCWD daan na ug gipanglumotan na.

Karon, ang MCWD mopatuman og 12 porsiyento nga umento sa bayranan sa tubig. Para namo nga namuyo sa bukid, gamay ra kaayo ang ipatuman nga usbaw kon itandi sa mahal nga presyo sa tubig nga among gibayran gikan sa mga negosyante’g tubig.

Kami sa bukid nagbayad og P73 ang matag cubic meter nga tubig. Usa ka buwan makabayad ko og P1,400 kapin bisan og apilan pa nako’g gamit og tubig-uwan.

Hangyo lang unta sa MCWD nga kon mopatuman na kamo og usbaw, paabuta sa bukid ang inyong koneksyon. Kon patungan na og 12 porsiyento, ang among bayranan tag P90 na ang cubic meter.