Comar ibalhin sa BFP-7

CEBU, Philippines - Wala pa tantong moinit sa iyang lingkuranan isip city fire marshal sa dakbayan sa Sugbu si Senior Superintendent Aderson Comar apan aduna nay mga report nga ibalhin na kini ngadto sa rehiyonal nga buhatan sa Bureau of Fire Protection.

Si Comar mitug-an sa mga tigbalita nga adunay mga report nga bakante ang pwesto sa Regional Fire Marshall for Administration nga giingong maoy paokuparan kaniya.

Hinuon giklaro ni Comar nga wala pa siya makadawat og opisyal nga suwat sa maong lahugay apan kung siya ang pasultihon, nakontento na siya sa iyang kasamtangang posisyon. Gikatakdang pulihan si Comar sa kasamtangang Talisay City Fire Marshall nga si Chief Inspector Vonrod Fernando Dubluis.

Samtang si Mayor Michael Rama nagdumili pa sa paghatag og komento gumikan kay wala pa siya kadawat sa suwat ug iyang gipahibalo nga iya kining lingkoran sa higayon nga makadawat siya sa order.

Samtang si Cebu City Administrator Jose Marie Poblete mipadayag nga dako og natampo si Comar sa pagdumala niini sa kabomberuhan sa dakbayan ug gani siya nakadayeg sa pagpangulo niini sa mga bombero panahon may alarma sa sunog.  - BANAT NEWS