Universal health care bill tukion sa Kapitolyo
CEBU, Philippines — Nia sa Sugbo si Senador Sonny Angara karong adlawa aron pagpahigayon sa public hearing sa giduso nga Universal Health Care Bill.
Kini ipahigayon sa Capitol Social Hall alas 9:30 sa buntag hangtud alas 12:00 sa udto diin giawhag ang publiko sa pagtambong.
"Nagagalak akong makabisita muli sa Cebu upang idaos ang hearing ng Senado ukol sa ilang Universal Health bills. Nararapat lamang na mapakinggan ang boses ng ating mga kababayan diyan at maiparating ang kanilang mga hinanaing at kuro-kuro sa ma-isyung kinahaharap,” matud ni Angara sa gipadala nga press release sa Banat News.
Gawas ni Angara kinsa maoy Senate Finance Committee vice chairman, si Senador JV Ejercito motambong sab sa kalihukan.
Sa hapon moadto si Angara sa Siyudad sa Mandaue ug makigkita kang Mayor Gabriel Luis “Luigi” Quisumbing alang sa pag-apud-apod og mga school bags sa mga tinun-an.
Sa laing bahin, si Angara nanawagan sa Philippine Health Insurance Corporation (PhilHealth) nga palapdan ang ilang primary care package diin angayan ilakip ang executive check-ups ug laboratory tests.
“This would also encourage Filipinos to have a healthier lifestyle with less out-of-pocket expenses,” matud ni Angara.
Sa pagkakaron, ang PhilHealth nagdalit lang og primary care benefit package nga gitawag og Tamang Serbisyo sa Kalusugan ng Pamilya o Tsekap para sa mga indigents, sponsored members ug overseas workers ug ang ilang qualified dependents.
"We commend PhilHealth for giving priority to the poorer sectors but such primary care package should be available for all,” dugang ni Angara kinsa usa sa mga authors sa Universal Health Care Act. (BANAT NEWS)
- Latest
