LPA gilantawan mahimong bagyo

CEBU, Philippines — Kasarangan ngadto sa kusog nga pag-uwan ang masinati sulod niining semanaha tungod sa presensya sa Low Pressure Area nga gilantawan nga mamahimong bagyo.

Hingpit na nga nakasulod kagahapon sa nasud ang LPA diin kasamtangan kining nahimutang sa Hinatuan, Surigao del Sur.

Matud ni Engr. Jhomer Eclarino, weather specialist sa PAGASA-Mactan, nga kung ang LPA mahimong bagyo tawgon kini og Urduja diin base sa weather data, nagdala kini og daghang pag-uwan hinungdan nga dako ang posibilidad nga adunay mga pagdahili sa yuta ug pagbaha.

Sumala pa ni Eclarino nga ang dautan nga panahon masinati hangtud pa karong Sabado diin hinay ang pag-irog sa LPA tungod sa pagbira sa High-Pressure Area ug sa lain pa nga weather system.

Gibutyag ni Eclarino nga gipaabot usab ang kusog nga hangin sa kadagatan nga makamugna og dagkung pagbalud hinungdan nga pahimangno sa PAGASA nga dili maayo ang paglawig ilabi na ang gagmay nga sakyanan sa kadagatan ug mismo ang mga mananagat.

Gipahibawo ni Eclarino nga laing weather system nakaapektar sa nasud mao ang tail end of the cold front. (BANAT NEWS)