P50 mil nga legal aid ipadayon ni Tom
CEBU, Philippines — Bisan sa mga pagsaway sa oposisyon gipasalig ni Cebu City Mayor Tomas Osmeña nga ipadayon niya ang paghatag sa P50,000 nga legal assistance sa polis nga makapatay og kriminal samtang naghimo sa trabaho.
Matud ni Osmeña nga dili niya masabtan ang logic sa mga konsehal sa habig sa oposisyon kinsa niingon nga ang paghatag og legal assistance magdasig kini og “lawlessness” ug “violence”.
“If we are going to follow his logic, why don’t we disarm them, policemen? Because when policemen carry guns, you might be promoting violence,” sigun ni Osmeña.
Sumala pa ni Osmeña nga nakahinumdum siya nga ang mga polis mahadlok nga mohimo sa ilang trabaho tungod kay nabalaka nga makasugat og problema sa mga human right advocates.
Gamiton ni Osmeña ang iyang discretionary funds karong tuiga nga balor og P7.4 milyones samtang P7.8 milyones alang sa sunod tuig sa maong katuyoan ingon man andam sab siya mogamit sa personal nga kwarta kun gikinahanglan.
Gitataw ni Osmeña nga wala niya gisunod ang istilo ni Presidente Rodrigo Duterte tungod kay sa wala pa nilingkod sa katungdanan ang Presidente nihatag na siya og P50,000 sa kapolisan nga nakigbatok sa mga kriminal.
Gusto ipaabot sa mayor nga andam niya suportahan ang kapolisan nga naghimo sa ilang trabaho diin usa sa gihimong sumbanan niini mao si SPO1 Adonis Dumpit nga gipasakaan og kaso tungod sa pagpatay kang Ronron Go niadtong 2004 sa Villagonzalo II, Barangay Tejero sa siyudad.
Sigun ni Osmeña nga gisuportahan niya si Dumpit bisan og nawagtang kini sa serbisyo sulod sa unom ka tuig ug gani gibayran niini ang piyansa alang sa termporaryong kagawasan. (BANAT NEWS)
- Latest
