Arce balik sa Probe Team
CEBU, Philippines — Gibalik na ni Cebu City Mayor Tomas Osmeña isip pangulo sa Prevention, Restoration, Order, Beautification and Enhancement(PROBE) Team si Raquel Bohol Arce kinsa naila nga kaalyado sa Barug Team Rama.
Sugod niadtong adlaw’ng Miyerkules ang pag-asumir ni Arce isip pangulo sa PROBE diin hulip siya kang Jesus Berido nga maoy molingkod sa posisyon ni Arce sa Anti-Mendicancy program sa siyudad.
Ang rason sa pagbalik ni Osmeña ni Arce sa PROBE kini tungod sa mga manindahay nga matud pa gahi og ulo nga nagbabag sa dalan.
Gihulagway sa mayor maayo ang trabaho ni Berido sa PROBE apan si Osmeña miingon gikinahanglan sa siyudad ang ‘decisive’ nga tawo sama ni Arce.
Ang mayor miingon ang proseso niini kun makadawat siya og reklamo mahitungod sa mga sidewalk vendors nga nagbabag sa dalan iyaha kining ipaabot kang Arce ug ang PROBE na maoy mopadangat niini sa Division for the Welfare of the Urban Poor (DWUP).
Kadtong mga gireklamong mga manindahay hatagan og lima ka adlaw nga lugway aron mangunay og guba o kaha mohimo og kasabutan apan kon human sa lima ka adlaw wala gihapo’y mahitabo ipahigayon gyud ang demolisyon.
“She was doing a good job in Anti-Mendicancy as a matter of fact Lea Japson doesn’t want to give up I said no. Arce is good as a matter of fact I’m promoting her only I need a berdugo somewhere,” sigon ni Osmeña.
Si Arce sa iyang bahin miingon nga ‘flattered ug happy’ siya sa pagbalik ni Osmeña sa iyaha sa PROBE dungan sa pagbutyag nga wala niya kini gilauman.
“Wala gyud, that’s was Monday of last week. Ang Office ni Madam Margot maoy nag-inform nako, unya kaganina lang nako nadawat ang order,” asoy ni Arce.
Sa pakig-estorya ni Arce sa mayor kagahapon nangayo kini og policy direction. Mahitungod niining mga manindahay nga nagbabag sa dalan nakig-meeting kini sa DWUP ug sa Executive Assistant to the Mayor Bimbo Fernandez kay ang mga nahisgutan man ang mga naghupot niini. (BANAT NEWS)
- Latest
