Namusil sa videokehan nadakpan

CEBU, Philippines — Nadakpan sa hot pursuit operation sa kapolisan ang duha ka suspek sa pagpamusil patay sa niaging gabii sa videoke-han sa Cogon East, Lungsod sa Carmen.

Si Senior Police Officer 2 Simplicio Gibo sa Carmen Police Station niila sa nadakpan nga sila si Jimboy Singson ug Eljun Tagocong, pulos 25-anyos ang panuigon ug nagpuyo sa maong dapit.

Ang duha maoy gitumbok nga nagpusil patay sa biktima nga si Andrew Bravo, 50-anyos, taga Barangay Poblacion sa nahisgutang lungsod.

Matud ni Gibo nga nagkaabot lang sa videoke-han ang biktima ug ang duha ka suspek hangtud nga nagkasuyaay sa ilang pagkanta nga nisangko sa panaglalis.

Dugang ni Gibo nga nabadlong hinuon sa mao nilang panaglalis ang biktima ug ang duha ka suspek apan nagbilin kini og pagdumot nga maoy hinungdan sa ilang pag-una og gawas sa videoke-han.

Sa paglabay sa pipila ka gutlo, ang biktima nakahukom na sa pagpauli ug nigawas sab sa videoke-han ang mga suspek diin ang .9mm nga armas nga giluklok ni Tagocong ang dali nga giibot ni Jimboy dayong pusil sa makaduha ka higayon ngadto sa biktima.

Ang biktima nakabaton og samad pinusilan sa iyang dughan ug abaga hinungdan nga dali kining gihatud sa Danao Ciy Provincial Hospital apan gideklarar kini nga dead on arrival. (BANAT NEWS)