Mga sam-ang sa Mandaue hot spot

CEBU, Philippines — Giila nga hot spot ang lima ka sementeryo sa Dakbayan sa Mandaue hinungdan nga magtinabangay ang kapolisan, traffic enforcers ug ang buhatan sa Bantay Mandaue sulod sa 24-oras sa Adlaw sa mga Santos sa Nobiyembre 1 ug Adlaw sa mga Kalag sa Nobiyembre 2. Kini ang nasayran sa Banat News kang Felix Suico nga maoy hepe sa Bantay Mandaue ug City Disaster Risk Reduction and Management Office.

Magsugod ang hiniusang pagbantay sa Oktubre 31 sa gabii ug matapos kini sa Nobiyembre 2 sa gabii.

Giila ni Suico ang mga sementeryo nga mao ang Municipal Cemetery, Mandaue Park, Cross Park, Catholic Cemetery nga pulos anaa sa Barangay Guizo ingon man ang sementeryo sa Barangay Pagsabungan.

Matud pa ni Suico nga ang sementeryo sa Pagsabungan maoy ilang nakita nga delikado kaayo ang dalan ilabi na panahon nga mag-uwan tungod sa kaguba.

Samtang adunay upat ka sementeryo nga nahimutang sa Barangay Guizo nga gipaabot nga hugopan sa daghang tawo nga moduaw sa mga lubong sa mga minahal sa kinabuhi.

Dugang ni Suico nga ilang gidili nga maokupahan sa mga manindahay ang nagkaatbang nga sidewalk nga makahatag na unya og kahasol sa mga tawo kay maglisud na man sa ilang pag-agi.

Si Suico niingon nga magbutang usab sila sa ilang medical team sa matag ganghaan sa maong mga sam-ang nga maoy motubag alang sa dinaliang panginahanglan sama sa makuyapan ug uban pa.

Higpit usab nga gidili ang pagdala og ilimnong makahubog ug mga hait nga hinagiban sa mga tawo nga mosulod sa sementeryo.

Gidili usab ang pagpataka og labay sa mga basura ug ang mga eco-warden sa City Environment and Natural Resources (CENRO) mohimo usab sa ilang pagbantay alang sa pagpatuman sa kalimpyo sa palibot. (BANAT NEWS)