Walo gidaro sa trak
CEBU, Philippines — Walo ka mga tawo ang naangol human usa ka Mitsubishi canter ang ni-overtake sa usa ka bus de pasaheroan sa may Barangay Langub, Asturias niadtong Sabado sa udto ang nibangga ngadto sa traysikol nga gikasugat dayon nalahos sa multicab nga nag-parking.
Ang mga naangol naglangkob sa drayber sa traysikol nga si Tortillano Macapaz, 61, taga barangay San Roque, mga pasahero Lee Kathleen Ondong, 23, Lyka Ondong, 20, Akiel John Ediza, upat pa ka buwan, pulos taga Barangay Santa Lucia, ug lakip ang mga naghakot og kahoy nga sila si Christopher Jayme,23, Abet Jayme, 28, Sulpicio Jayme,42, ug Nelson Inolpe, 48.
Samtang giila ang drayber sa trak nga ni-overtake mao si Antonio Embuscado, 30, taga Baliwagan, Balamban.
Matud pa ni Police Officer 3 Excell Aguanta, Desk Officer sa Asturias Police Station si Antonio nangangkon nga kalit nihunong ang gisundan niining bus mao nga ni –overtake kini apan naharos niini og bangga ang mga biktima.
Dugang pa ni Aguanta, human naigo ni Embuscado ang tricycle nilahos pa kini sa nag-parking nga multicab sa barangay nga adunay naghakot og kahoy nga mga tawo.
Daling nilahos si Antonio sa police station sa Asturias ug kasamtangan kining gitanggong samtang nagpaabot pa sa mga reklamante kung mopasaka ba kini sila og kaso.
Gibutyag ni Aguanta ang inahan sa upat ka buwang bata nga naangol wala na makahatod sa lain pa niining anak nga namatay tungod sa sakit kay nakasugat man kini og disgrasya samtang magpa-checkup. -/IBM (BANAT NEWS)
- Latest