Duha patay sa landslide

CEBU, Philippines — Duha ka mga tawo ang nakalas human sa nahitabong landslide sa may Sitio Lower Ponce, Barangay Capitol Site ning Dakbayan sa Sugbo alas-8:45 sa gabii niadtong Huwebes.

Ang nakalas mao sila si Elpidio Geraga, 64-anyos ug Juvelyn Sanipa, 31-anyos, residente sa maong lugar. Matud pa ni Pamela Gabayan, social  worker sa barangay Capitol Site, gumikan sa kusog nga ulan nihumok ang yuta nga niresulta sa pagkatumba sa punoan sa kawayan padung sa        mga balay sa nangamatay.

Nagtinabangay ang tanan nilang mga rescuers apan nilanat gayud og pipila ka oras una nakuha ang patay nga lawas sa mga biktima tungod sa kalisod sa agianan kay gikinahanglan pa moagi og sapa.

Dugang pa ni Gabayan, nakalingkawas ang pamilya sa mga nangamatay ug gipahiluna sila karon sa ikatulong andana sa barangay hall kay risgo kung mobalik kini sila sa maong lugar.

Gitug-an ni Gabayan, unom ka mga pamilya ang kasamtangan nga anaa sa ilang barangay hall diin nakig-alayon na sila sa buhatan sa Department of Social Welfare and Services, kinsa nihatag og bugas ug canned goods ngadto sa mga apektado nga pamilya.

Gibutyag ni Gabayan nga mohatag og tag P3 mil nga burial assistance ang barangay ngadto sa mga pamilya nga namatyan.

Ang pangulo sa Cebu City Disaster Risk Reduction and Management Council Nagiel Bañacia, nibutyag nilanat og upat ka oras ang ilang pagkuha sa mga patay nga lawas tungod peligro kaayo alang sa mga rescuers ang  lugar.

Samtang gipahibalo ni Cebu City Mayor Tomas Osmeña nga mohatag ang siyudad og P20,000 sa mga kabalayan nga naguba ug burial assistance alang sa pamilya niadtong mga namatay.

 “Must be, the whole bamboo cluster fell on their house, my God, abi nako lig-on ang bamboo sa roots ba, I don’t know what happen,” sigon sa mayor.

Si Bañacia naghimo na og assessment kagahapon ug duna sila’y gihatag mga measures aron dili na masubli pa ang maong hitabo. Apan giangkon ni Bañacia nga ang maong dapit dili gyud unta angayang puy-an tungod sa kadelikado sa lugar.

Subay niini, si Reynaldo Geraga, 25 anyos, anak sa namatay nga si Elpedio miingon nga dihang nahibawo siya sa nahitabo dali kining miuli sa ilahang panimalay gikan sa gitrabahoang kan-anan aron pagluwas sa iyang pamilya apan uwahi na kay nadat-ugan na ang iyang amahan.

Kini miingon nga 20 ka tuig na sila nagpuyo sa maong dapit apan tungod kay giawhag man sila sa barangay ingon man sa siyudad nga pabalhinon ilaha kining tumanon. (BANAT NEWS)