Konektado ni Quiamco sikop

CEBU, Philippines - Mokabat sa P236 mil ang balor sa shabu ug upat ka ilegal nga armas ang nasakmit sa mga operatiba sa Provincial Intelligence Branch sa managlahing operasyon pinasikad sa search warrant sa Malolos, Lungsod sa Barili kagahapon sa kadlawon.

Nasikop si Gerardo Caballes Basera samtang nakaikyas si Junibert Caballes Saldo, kinsa mag-agaw ug kauban sa negosyo sa shabu.

Nakuha gikan kang Basera ang tulo ka dagkong pakete sa shabu nga mokabat sa P177 mil, usa ka kalibre .30 Garand, usa ka kalibre .30 Carbine nga dunay upat ka bala, usa ka kalibre .9mm black widow nga adunay lima ka bala, usa ka bala sa kalibre .50, usa ka electric sealer, usa ka digital nga timbangan ug drug paraphernalia.

 Samtang nakuha gikan sa panimalay sa nakaikyas nga si Saldo ang usa ka dakong pakete sa gidudahang shabu nga balor og P59 mil, usa ka airgun, duha ka gas tank ug kwarta nga P12 mil nga gituohang halin sa pagpamaligya og shabu.

Matud sa deputy chief sa PIB, Senior Insp. Nazarino Emia, nga natukhang na kaniadto ang duha apan sa ilang monitoring nasuta nga nibalik kini sa ilegal nga negosyo.

Adunay impormasyon nga aduna silay koneksyon sa napusilan patay nga polis nga si PO3 Ryan Martus Quiamco kinsa nalakip sa listahan sa mga durugista ni Presidente Rodrigo Duterte.

Ang asawa ni Basera niasoy ngadto sa kapolisan nga pirmeng makasaksi ang ilang mga anak nga magpayuhot og shabu sa ilang panimalay ang suspek kinsa nihimakak sa pasangil.

Samtang usa ka durugista ang nasikop sa mga sakop sa City Intelligence Branch sa Tisa, Dakbayan sa Sugbo.

Mobalor og P177 mil ang tulo ka medium nga pakete sa gidudahang shabu ang nakuha sa dinakpan nga si Michael James Johnson, 32-anyos.

Asoy sa hepe sa CIB, Chief Insp. Christopher Navida, nga makabaligya si Johnson og kapin 50 ka gramo matag semana apan gihimakak kini sa suspek. (BANAT NEWS)