P2.5M alang lang sa closure plan sa landfill

CEBU, Philippines - Magsugod na sa pagkuha og data sunod buwan ang Full Advantage Phil. International, Inc., ang negotiated service provider alang sa closure plan sa kontrobersiyal nga Inayawan Landfill sa Dakbayan sa Sugbo.

Nagkanayon ang pangulo sa Cebu City Environment and Natural Resources (CCENRO), Nida Cabrera, nga ang maong service provider maoy personal nga niduol sa kagamhanan sa siyudad aron paghimo sa closure plan sa landfill nga nagkantidad og P2.5 milyones nga gikwestiyon sa konseho.

Kini nipasabot nga ang maong pundo i-bidding unta apan tungod kay napakyas, gipili nila nga makig-negotiate sa Full Advantage Phil. International, Inc.

Ang service provider maoy mohimo og assessment sa sitwasyon sa landfill, pagkuha og data kun pila ka tonelada sa basura ang naa sa landfill ug ang status sa leachate generations ug uban pa.

Ang konseho nangayo sa status sa P2.5 milyones human si Konsehal Eugenio Gabuya Jr., chairman sa committee on public services, niduso og resolusyon nga nangayo og pagtugot sa konseho sa pagkuha sa P2.5 milyones gikan sa local development fund alang sa rehabilitation, remediation ug closure plan sa landfill.

Sigun ni Cabrera nga ang maong service provider gilauman nga moumol og rekomendasyon alang sa rehabilitasyon human unya  sa ilang assessment.

Ang rehabilitation plan sa landfill nga gipresentar niadtong Martes ni Gabuya sa konseho gi-coordinate sa Environmental Management Bureau-7.

Hinoon giklaro ni Cabrera nga gipresentar lang nila ang terms of reference sa procurement sa services sa EMB ug dili ang actual rehabilitation plan details tungod kay ang tanang items kinahanglan pa aprobahan sa konseho. (BANAT NEWS)