Drug den operator sikop
CEBU, Philippines - Nasikop ang usa ka drug den operator lakip na ang upat ka durugista sa Sitio Sambagan, Barangay Tangke, Dakbayan sa Talisay niadtong Domingo sa hapon.
Si Evangeline Piloto, 42-anyos, ang adunay warrant of arrest sa kaso may labot sa ginadiling drugas sa sala ni Judge Glenda Go sa Regional Trial Court (RTC) Branch 65 sa Dakbayan sa Talisay.
Ang mga awtoridad nakadawat og impormasyon sa presensiya ni Piloto sa ilang panimaye hinungdan nga wala sila maglangay sa pagrumbo sa lugar.
Ilang nasikop si Piloto ug nakahigayon pa gyud og sikop sa laing tulo ka adis-adis nga sila si Jiji Obrero, 31-anyos, nga nakuhaan og tulo ka gagmay nga pakete sa shabu ug sila si Henry Pelipas, 29-anyos ug si Ariel Alicayan, 26-anyos, pulos taga Lungsod sa Minglanilla.
Nakuhaan ang duha og mga paraphernalia sa paggamit og ilegal nga drugas. Asoy sa kapolisan nga padayon gihapon si Piloto sa iyang pagka-drug den operator human siya napasakaan og kaso kaniadto. (BANAT NEWS)
- Latest
