Assistant warden sa CPDRC nihimakak sa pasangil

CEBU, Philippines - Gihimakak sa assistant warden sa Cebu Provincial Detention and Rehabilitation Center (CPDRC) nga si Audesti Miguel ang pasangil sa mga jail guards nga mobunot siya sa iyang armas kun dili dayon maablihan ang gate sa iyang pagsulod.

Nagtuo siya nga giinitan ra siya sa mga guwardiya tungod kay adunay pipila ka higayon nga nakasakop siya nga nanghilabot og food supplies alang sa mga piniriso.

Si Miguel nagkanayon nga wala pa siya kadawat sa maong reklamo batok kaniya.

Ang CPDRC jail guards nipadala og suwat reklamo ngadto sa officer-in-charge sa CPDRC nga si Bobby Legaspi batok kang Miguel nga matud pa duha ka higayon nga nibunot kini sa iyang armas samtang nasuko tungod kay wala dayon naablihi ang gate.

Ang maong mga guwardiya wala nagpaila sa maong suwat nga gipadala sa buhatan sa gobernador.

Si Miguel nihagit sa mga guwardiya nga magpaila ug isulti ang ilang mga reklamo.

Si Miguel nisaysay nga dili moubos sa tulo ka higayon nga nakasakop siya og guwardiya nga adunay gibuhat nga kahiwian sulod sa prisohan. Matud ni Miguel nga nakaduso na siya og report kabahin niini. (BANAT NEWS)