Polis vs polis

CEBU, Philippines - Usa ka polis nga gipaubos sa imbestigasyon tungod sa ilegal nga drugas ug giisip nga national level high value target ang nakigpinusilay sa mga polis hinungdan nga kini napatay samtang nasamdan ang iyang asawa kagabii diha sa Barangay Pooc, sa Dakbayan sa Talisay.

Ang mga sakop sa Regional Special Operations Group (RSOG) -7 nagpahigayon og buy-bust operation batok kang PO3 Ryan Martus Quiamco kinsa kanhi nadestino  sa Cebu Provincial Police Office ug narelibohan niadtong Agosto 2016 human kini naapil sa listahan sa mga durugista ni Presidente Rodrigo  Duterte.

Dali nga gidala sa tambalanan ang asawa niini nga si Rizalyn Quiamco human naangol.

Asoy pa sa hepe sa Regional Intelligence Divison nga si PSupt. Jonathan Cabal nga ni-apply sila og search warrant batok ni  PO3 Quiamco niadtong Hulyo nga pinirmahan ni Judge Jerry Dicdican sa Regional Trial Court Branch 25 sa Dakbayan sa Danao.

Apan matud pa ni Cabal nga daw nakabantay kini hinungdan nga nisibat kini diretso paingon sa Manila.  Gihuwat sa maong suspetsado nga mahupas ang maong search warrant pagkahuman sa napulo ka adlaw usa siya miuli og balik dinhi.

Matud pa nga napalitan nila og drugas si Ryan kauban sa iyang asawa sakay sa ilang sakyanan nga Isuzu D-Max diha sa South Road Properties sa Dakbayan sa Talisay ug sa dihang nakabantay kini nga polis ang iyang kaatubang giingong misukol kini og pinusilay.

Laing naangol mao ang usa ka membro sa RSOG nga si PO3 Jemmuel Villaflores kinsa nakaangkon og samad pinusilan sa iyang bukton.

Si Quiamco gituohang maoy distributor hangtud karon ni Franz Sabalones kinsa mitahan sa kapolisan niadtong pormal nang milingkod si Duterte.

Gitataw ni Cabal nga ila pang ukayon ang Statements of Assets Liabilities and Networth ni Quiamco kinsa  aduna nay upat ka balay, unom ka mga mahalong sakyanan ug usa ka dakong basakan sa Anda, Bohol bisan pa og usa lang kini ka polis.

Niadtong nakalabay’ng Agosto 9, nadakpan ang paryente niini nga si John Gabiana Quiamco, 25, usa pud ka high value target sa mga ahente sa Philippine Drug Enforcement Agency-7 niadtong miaging Miyerkules kauban sa iyang kapuyo nga si Ma. May Joy Villamala, 22.

Sa adlaw usab nga nadakpan ang manghod sa polis, napatay nianang pagkahapon sa mga sakop sa PDEA-7 si Frederick “Wengweng” Villamala diha sa Barangay Sambag 2 ning dakbayan sa Sugbo atol sa buy-bust operation. (BANAT NEWS)