Dalaw sa CPDRC gisuspenso
CEBU, Philippines - Gisuspenso sukad pa kagahapon ang dalaw sa Cebu Provincial Detention and Rehabilitation Center (CPDRC) human may nasakpan nga nagpalusot og ilegal nga drugas sulod sa prisohan.
Sa blotter report sa CPDRC, alas 3 sa kaadlawon kagahapon nihimo og surveillance operation si PO2 Melchorito Suelto ug PO1 Gerome Hontanosas sa cell number 70.
Kini human nakadawat og report nga padayon gihapon ang pagbaligya og ilegal nga drugas sulod sa prisohan.
Ang mga polis nigamit kini og hagdanan aron masusi gikan sa bintana sa maong selda ang gihimo sa mga priso ug didto nakita ang usa ka priso nga nitunol og pakete sa gituohang shabu ngadto sa laing piniriso.
Giila ang maong piniriso nga si James Mark Gallarde sa cell number 13 kinsa maoy nihatag sa tulo ka piniriso nga sila si Greggy Mero, Ruldan Ruta ug Estilito Cordizar sa cell number 70 kinsa nagduwa og card games sulod sa selda.
Gi-report dayon sa kapolisan ang maong panghitabo sa desk officer niini nga si PO1 Bit Voltaire Solima kinsa nihimo sa imbestigasyon ug nikompronta sa upat ka piniriso kinsa nihimakak sa pasangil.
Si Bobby Legaspi, officer-in-charge sa CPDRC, nagkanayon nga tungod sa maong insidente, suspendido ang dalaw sa provincial jail sukad gahapon hangtud karong adlawa.
(BANAT NEWS)
- Latest