Taiwanese patay sa unos

CEBU, Philippines - Patay ang usa ka Taiwanese nga ginang samtang luwas ang mga kauban dihang nakasugat og kusog nga uwan ug hangin ang ilang gisakyan nga pump boat sa island hopping alas 5 sa hapon niadtong Miyerkules sa may Okoy, Santa Fe, Isla sa Bantayan.

Ang nakalas mao si Chan Su Hsiang, 63, samtang ang mga nangaluwas mao sila si Yih Yuchun, Bryan Libeter, Charlie Ryan Libeter, Drek Anthony Libeter, Yeh Yajen, Tsae Yiling, Yeh Yunsi, Yeh Chungan, Wang Yang, Wu Yun, Wang Pensi, ug Wang Hua,

Matud ni Police Officer 1 Albert Jimenez nga bakasyonista ang mga langyaw ug nag-island hopping sa Virgin Island kuyog ang pipila ka Pinoy sakay sa pump boat nga gipanag-iya ni Jupiter Flores.

Dihang padulong na sila mopauli nakasugat sila og kusog nga uwan ug hangin hinungdan nga nalimbuwad ang ilang gisakyan.

Ang uban naanod hinungdan nga dali sab nakatabang ang pipila ka staff sa Virgin Island samtang gidala sa Bantayan District Hospital si Hsiang apan gideklarar kining patay na gumikan sa pagkalumos.

Dugang ni Jimenez nga dili hinoon overload ang pump boat kay mokarga man kini og 30 ka tawo apan base sa pamahayag sa pipila ka biktima gisugat sila og kusog nga hangin ug uwan.

Ang mga biktima anaa pa sa resort nga ilang gipuy-an samtang gi-process pa ang kauban nila nga nakalas.

Atol sa tigum nga gipatawag ni Santa Fe Mayor Jose Esgana, si Flores namahayag nga susama og buhawi  ang niigo kanila. (BANAT NEWS)