Kadudahang mga tawo sa Talisay

CEBU, Philippines - Nasigpatan ang mga kadudahang tawo sa pipila ka barangay sa Siyudad sa Talisay.

Si Bulacao Barangay Kapitan Raul Cabañero nga maoy presidente sa Association of Barangay Councils nibutyag nga adunay pipila ka kapitan ang nisumbong nga adunay mga tawo nga ang sinultihan sama sa mga Muslim nga ilang nasigpatan sa ilang mga barangay.

May naabot sab nga mga tawo nga giingong sakay og pumpboat nga nidunggo sa Barangay Tangke ug Pooc.

Tungod niini, iyang giawhag ang kapolisan ingon man katawhan nga magmabinantayon ug mo-report dayon sa mga kadudahan og lihok sa ilang lugar.

Matud ni Cabañero nga kung mga maayong tawo ang nasigpatan, moduol unta sila sa barangay hall ug mopakita sa ilang mga dokumento ug motug-an sa ilang katuyuan.

Si Konsehal Gail Restauro sa siyudad nitataw nga sa ilang barangay sa San Isidro, duha ka lalaki ang ilang gidudahan tungod kay sa gabii modaghan sila sa ilang giabangan nga apartment ingon man magtaptap sab sa ilang mga nawong.

Dihang gi-report sa mga awtoridad ug gisusi, dali sab nga nawagtang ug nibawi sa ilang kwarta nga gi-advance sa ilang giabangan nga kwarto.

Ang gihimo sa mga lalaki ang nakapasamot sa pagduda sa mga residente sa lugar.

Giawhag sab ang mga nagpaabang og mga kwarto o panimaye ilang susihon pag-ayo ang mga tawo nga moabang. (BANAT NEWS)