Safety sa fuel firms gisusi

CEBU, Philippines - Gitigum sa kagamhanan sa Dakbayan sa Sugbo ang mga fuel companies aron tukion ang pagpangandam batok sa terorismo.

Matud ni Konsehal Dave Tumulak, chairman sa committee on public order and safety, nga gihimo nila kini gumikan sa nikatap nga hulga nga mohimo og major terroristic attack ang grupo sa mga terorista diin target nila ang mga petroleum trucks ug LPG delivery trucks nga i-hijack ug gamiton isip vehicle bombs.

Ang konsehal nihangyo sa mga fuel companies nga istriktong ipatuman ang ilang mga security safety measures.

Gitataw ni Tumulak nga gipatawag nila ang mga nahisgutan aron makapangandam bisan pa man og wala’y kompirmasyon gikan sa mga law enforcement agencies apan gikonsiderar gihapon nila nga risgo.

“Ako silang gipa-submit sa ilang mga safety usual procedure bitaw unya atong i-review, tan-awon nato ang ila para pud pag-coordinate pud sa other agencies sa ilang mga security protocols. Giseguro lang gyud na nato,” matud ni Tumulak.

Si Mayor Tomas Osmeña niingon nga igo lang sila nihatag og mga pamaagi sa fuel companies sa mga angay buhaton. (BANAT NEWS)