Banat ( Leaderboard Top ), pagematch: 1, sectionmatch: 1

637 ka tawo sikop sa Oplan Silhig

CEBU, Philippines - Miabot ngadto sa 637 ka tawo ang nasikop sa gipahigayon nga “Oplan Silhig” sa Police Regional Office (PRO)- 7.

Nalakip sa maong mga nasikop ang duha ka polis kinsa nag- Absent without Official Leave (AWOL) ug igsuon sa usa ka polis. Ang Oplan Silhig gisugdan niadtong Hunyo 12 ngadto sa 18 ug miabot ngadto sa 188 ka drug operations ang napahigayon sa kapolisan nga niresulta sa pagkasikop sa 231 ka tawo nga nalambigit.

Mikabat sa 534 ka gramong shabu nga dunay market value nga P6.3 milyones kini base sa Dangerous Drug Board Value.

Lakip sa maong operasyon ang pagkakompiska sa 15 ka loose firearms ug siyam ka tawo ang naaresto niini. Gawas niini, 37 ka wanted persons ang nasikop ug 43 ka mga illegal gambling machine ang nakompiska lakip ang dul-an sa P16 mil nga gituohang pusta.

Matud pa ni Senior Superintendent Joel Doria, lima ka high value target ang ilang nasikop lakip ang kanhi duha ka polis nga sila si Police Officer 1 Aaron Estarte ug Police Officer 1 Joseph Glenn Burlas.

Dugang pa ni Doria, padayon ang ilang pag-monitor sa mga tawo nga nalambigit sa ilegal nga drugas ug mga badlongon sa katilingban subay sa ilang Oplan Pokemon. Ang kasamtangan nga hepe sa Abellana Police Station Chief Inspector Maria Teresa Macatangay nibutyag nga si Estarte usa ka high value target ug nag-AWOL sa pagka polis niadtong Nobiyembre, 2011 ug atol sa pagkasikop niini nakuhaan kini og dul-an P45 mil nga kwarta.

Samtang si Burlas sa wala pa nisurender giingong aduna kini daghang kaso nga gi-atubang ug nakuhaan usab kini og dili moubos sa P118 mil nga balor sa drugas atol sa pagkasikop niini. Si Escarte sa iyang bahin, nitug-an nga na-AWOL siya tungod sa pagpangita niya sa iyang kapuyo hangtud nga wala siya kabalik sa saktong adlaw sa iyang duty.

Giingong si Escarte miangkon nga mogamit siya og ginadili nga drugas apan adto na siya sa korte motubag sa reklamo batok kaniya.

Samtang ang igsuon ni Senior Police Officer 3 Nestor Canlobo nga si Christopher Canlobo nasikop usab kini sa iyang igsuon ug kapolisan sa dakbayan sa Talisay human nigawas ang warrant of arrest batok kaniya.Gitug-an ni Canlobo, malipayon ra usab siya nga nasikop aron malimpiyo usab ang iyang pangalan. (BANAT NEWS)

  • Follow Us: