13 ka pari gihagit ni Palma paglatas sa tahas

CEBU, Philippines - Ang Arsobispo sa Sugbo Jose Palma mihagit sa 13 ka pari sa Archdiocesan of Cebu kinsa misaulog sa ilang 25th Sacerdotal anniversary kagahapon nga padayonon sa paglatas ang ilang tahas ilabi na ang pagtabang sa mga nanginahanglan ug mga kabus.

Ang maong hagit atol kini sa gipahigayong Santos nga Misa alang sa kasaulogan nga gidumala ni Palma kagahapon sa alas 9:00 sa buntag diha Cebu Metropolitan Cathedral.

Matud pa sa Arsobispo ang misa nga iyang gipahigayon paghimaya ug misa pasalamat tungod kay bisan sa daghan og mga pagsuway ug hagit ang kaparian sa ilang pagdumala sa lain-lain nga mga parokya sugod niadtong tuig 1992 apan tungod kay ang Dios ang nagtawag ug nagpili kanila hinungdan padayon sila gihapon nga nagserbisyo sa katawhan.

Ang silver jubilarians nga gitawag og diocesan clergy of Cebu batch 92 mao sila si Retired Reverend Monsignor Alfredo Romanillos (Team moderator, St. Joseph Parish, Mabolo, Cebu City) Padre Ildebrando Bohol (Christ the King Parish, Alang-alang, Mandaue City); Padre Miguelito Sarmago (Santa Ana Parish, Barili Cebu); Padre Alvin Codilla (San Isidro Labrador Parish, Talisay City); Padre Dennis Flores (Archdiocese of Vancouver British Columbia, Canada); Padre Renato Senining ( St. Gabriel the Archangel Parish, Santander Cebu); Padre Eligio Suico (Commision on Family and Life Pope John XXIII, Seminary); Padre Divino Jurcales (St. Francis Xavier Parish, Alegria Cebu); Padre Expedito Lape (San Isidro Parish, San Fernando); Padre Reynaldo Pianar (PNP chaplain); Padre Isidrito Ducao II ( Our Lady of the Rosary Parish Tuyan, Naga Cebu); Padre Jose Adonis Aquino (Seminaryo Mayor de San Carlos) ug Padre Russel Sungcad (San Vicente Ferrer Parish Kampingganon Bantayan Island).

Si Padre Suico ang namulong sa grupo nipadayag sa iyang pasalamat sa tanan ilabi na sa mga layko tungod kay mabulokon ug makahuloganon ang ilang panaw sa pagka pari.

 (BANAT NEWS)