Balaud sa Talisay City State College giusab

CEBU, Philippines - Gipasar na sa Ubos Balay-Balauranan ang pag-usab sa balaud nga naghimo sa Talisay City College ngadto na sa Talisay City State College.

Si Deputy Majority Leader ug Kongresista Gerald Anthony Gullas Jr. sa primerong distrito sa Probinsiya sa Sugbo niduso sa House Bill No. 786 apan giusab kini isip HB No. 5147 dihang gipasar ug giduso ngadto sa Senado.

Matud ni Gullas nga ang balaudnon nga napasar mag-usab kini sa Republic Act No. 10594 nga nagmugna sa Talisay City State College nga nahimong balaud niadtong Hunyo 4, 2013.

“This bill seeks to clarify confusion, settle all uncertainties and avoid controversies that may arise in the conversion of the Talisay City College to Talisay City State College,” matud ni Gullas.

Matud ni Gullas nga adunay kalibog nga nitumaw sa nahaunang balaud sumala sa Commission on Higher Education sanglit ang balaud igo lang nag-usab sa Talisay City College ngadto na sa Talisay City State College.

Subay sa balaudnon nga giduso ni Gullas, gitataw niini nga usa ra ang maong kolehiyo  sa siyudad isip state college ug kinahanglan nga adunay accreditation gikan sa CHED ug gihatagan ang tunghaan sa pagkompleto sa tanang gikinahanglan hangtud sa Enero 1, 2019. (BANAT NEWS)