Mga patay nga sibilyan napalgan
CEBU, Philippines - Samtang nagdagan ang mga adlaw sa gihimong house to house clearing operations sa mga militar sa Marawi City nga giatake sa teroristang Maute ug Abu Sayyaf, nagkadaghan usab ang napalgang mga sibilyan nga nangamatay nga nagpasad diha sa karsada ug kabalayan.
Base sa uwahing report, miabot na og 16 ka mga biktima nga naipit sa gubat ang napalgan. Silang tanang mga sibilyan ug wala pa matino kun kinsa maoy nakapatay kanila.
Sa report sa GMA News.Tv nga nikutlo sa pamahayag ni Armed Forces of the Philippines spokesperson Brig. Gen. Restituto Pandilla ngadto sa Radio dzBB adunay grupo sa mga patay’ng lawas nga kasagaran mga babaye ug dunay duha ka bata nga nadiskubrehan ang mga sundalo gibanabanang 300 metros gikan sa Mindanao State University. Wala pa matino kun si kinsa ang maong mga biktima. Kagahapon sa buntag lain usab nga mga patay’ng lawas sa mga kalalakin-ang gibinaklid og gapos ang ilang nakit-an diha sa Barangay Matampay, nasayran nga mga trabahador sila sa usa ka panaderohan sa lugar.
Si Padilla nagkanayon nga prayoridad nila karon nga mapalayas sa Marawi City ang mga bandido ug maluwas ang uban pang naipit nga mga pamilya. Nasayran nga ang pagmagahi sa ubang sibilyan pagbiya kay gusto nilang bantayan ilang panimalay ug ang mga snipers maoy nakapalangay sa operasyon.
Nasayran usab nga hasta mga batang nag-edad pa og 10 anyos hangtud 16 anyos gigamit usab sa mga Maute sa maong pag-atake tungod kay adunay nakaengkwentro ang mga sundalo nga mga batang armado og M16 Baby Armalites Sumala pang Padilla paninguhaon nilang dili mapagan ang mga sibilyan mao nga nigamit lamang sila og surgical strikes. Gikan sa Wires/EIM (BANAT NEWS)
- Latest
