Special non-working holiday ang charter day sa Mandaue

CEBU, Philippines - Giaprobahan sa Ubos Balay-Balauranan ang House Bill No. 3404 tumong sa pagdeklarar sa Agosto 30 nga special non-working holiday sa Siyudad sa Mandaue.

Ang HB No. 3404 gipangamhanan ni Kongresista Jonas Cortes sa ikaunom nga distrito sa Probinsiya sa Sugbo ug kanhi mayor sa siyudad ug giduso na ngadto sa Senado.

Isip tubag sa hangyo sa konseho sa siyudad, si Cortes nisang-at sa maong balaudnon niadtong Agosto 31, 2016, usa ka adlaw human gisaulog ang ika-47 nga Charter Day.

Tuyo niini nga matagamtam sa katawhan sa siyudad ang kasaulogan ingon man makapalambo kini sa turismo kung special non-working holiday ang maong adlaw.

Sayo niini ang konseho nipasar sa resolusyon nga gipangamahanan ni Konsehal Demetrio Cortes Jr. nga naghangyo kang Kong. Cortes nga moduso og balaudnon sa Kongreso nga magdeklarar sa Agosto 30 nga  special non-working holiday sa siyudad.

Sa ingon nga paagi matud ni Konsehal Cortes nga dili na sila matag tuig maghangyo sa presidente sa nasud nga moluwat og Presidential Proclamation nga magdeklarar sa maong petsa nga special non-working holiday nga maoy ilang gihimo sukad sa niaging kapin na sa 40 ka tuig.

Hunyo 21, 1969, gilagdaan ang Republic Act 5519 o ang Charter sa Siyudad sa Mandaue.

Laing presidential proclamation niadtong Agosto 30, 1969 ang pormal nga nagdeklarar isip maoy charter day nga mao ang gisaulog matag tuig sukad sa panahon ni kanhi mayor Demetrio Cortes Sr. isip labing unang mayor sa siyudad. - /EIM) (BANAT NEWS)