500 kapin ka estudyante naka-pahimulos sa summer job program

CEBU, Philippines - Ang 570 ka tinun-an sa high school gikan sa 19 ka barangay sa Dakbayan sa Lapu-Lapu ang nakapahimus sa gipasiugdahan nga summer job program sa kagamhanan karong tuiga.

Ang maong mga tinun-an motrabaho og napulo ka adlaw matag usa kanila ug magdawat kini og suweldo gikan sa gahin sa kagamhanan nga P300 kada adlaw nga pagtrabaho.

Si  Mayor Paz Radaza miingon nga tumong sa maong programa ang paghatag og kahigayonan ngadto sa mga tinun-an nga niining panahon sa bakasyon makabaton sila og kuwarta gikan sa ilang madawat nga suweldo sa kagamhanan.

Sa nasayran nga ang mga barangay kapitan gikan sa 19 ka barangay sa dakbayan maoy gitahasan sa pagpili sa mahimong beneficiaries sa maong programa sa siyudad.

Ang kadaghanan sa mga tinun-an nga nakapahimus sa maong programa gidestino ngadto sa ilang tagsa-tagsa ka barangay alang sa clean and green program.

Dugang ni Radaza nga  limitado lang ang gahin sa kagamhanan alang karong tuiga maoy hinungdan nga dili gayud ang tanan nga tinun-an ang ilang kahatagan og kahigayon nga makasalmot niini.

Gipanghinaut sa mayor nga gamiton gayud sa mga tinun-an ang ilang sweldo alang sa ilang panginahanglan sa pagtungha karong pagbukas sa klase. Kini sama sa pagpamalit og school uniform, school supply ug uban pa. (BANAT NEWS)