Moalboal police gidayeg sa Taiwanese official

CEBU, Philippines - Gikahimut-an sa opisyal sa nasud nga Taiwan ang kapolisan nga sakop sa Cebu Provincial Police Office (CPPO) tungod sa ilang gitunol nga tabang ngadto sa ilang kataginasud nga      adunay deperensiya sa pangisip.

Mipadala og suwat ngadto kang PNP Director General Ronald Bato Dela Rosa si Jerry Chih-Yung Wang, Executive Assistant to Representative of  Taipei Economic and Cultural Office sa Pilipinas aron pahalipayan ang Moalboal Police Station sa pagtabang sa ilang kataginasud nga adunay mental illness niadtong Mayo 13.

Ang Moalboal Police gipangulohan ni Police Chief Jose Rovic Villarin diin sa suwat ni Wang, kini mibutyag nga ang pagtabang sa kapolisan nahimong instrumento sa panaghinigalaay.

Nasayran nga si Villarin maoy nangulo sa iyang mga sakop sa pagtabang sa 34-anyos nga babayeng Taiwanese national nga adunay deperensiya sa pangisip nga nanghasi.

Ang maong Taiwanese, gipapuyo sulod sa tulo ka adlaw sa police station samtang gipaabot ang inahan ug igsuon niini. Gidala usab sa mga polis ang maong langyaw sa psychiatrist aron masusi.

Kahinumduman nga si CPPO Director Eric Noble mimando sa iyang ginsakupan sa paghimo og random act of kindness ug ang gihimo sa Moalboal Police gikalipay niini. (BANAT NEWS)