Tag-iya sa nalunod nga M/V Fortuner pabayron

CEBU, Philippines - Padad-an og demand letter sa kagamhanan sa Dakbayan sa Talisay ang tag-iya sa M/V Fortuner nga nalunod sa kadagatan duol sa Barangay Cansojong sa nahisgutang siyudad pipila ka semana na ang nakalabay.

Pabayron og environmental fee sa kagamhanan sa Siyudad sa Talisay ang tag-iya sa nalunod nga barko subay sa nakalatid sa ilang ordinansa.

Si Konsehal Antonio Bacaltos Jr., mibutyag nga ilang iimplementar ang maong ordinansa hangtud nga dili pa makuha ang barko ilawom sa kadagatan.

Sa maong ordinansa, makabayad og P2 mil matag adlaw ang tag-iya sa barko ug magsugod kini sa adlaw nga nalunod hangtud na nga ma-salvage ang barko.

Magpatabang si Bacaltos sa ilang city legal officer sa pagpadala sa maong demand letter. Siya nagkanayon nga ila nang nahinabi ang liaison officer sa tag-iya sa  M/V Fortuner aron kini na ang mopadangat sa iyang amo.

Dugang sa konsehal nga ila gyud sigurohan nga makuha ang nalunod nga barko aron mahuwasan sila sa kabalaka nga aduna’y mahitabo’ng oil spill sa kadagatan nga maka-apektar sa mga mananagat sa lugar.

Ang Philippine Coast Guard Cebu Station una nang mitataw nga dili angay mabalaka ang mga barko nga moagi sa lugar kay ang giladmon sa gilunoran sa M/V Fortuner anaa sa 120 ka tiil. Samtang ilang gimonitor ang posibling pagtumaw sa oil spill hinungdan nga ilang giawhag ang tag-iya sa barko nga madali ang pag-salvage sa barko. (BANAT NEWS)