Mga opisyal sa Talisay gireklamo

CEBU, Philippines - Gipaimbestigar sa grupo sa mga mag-uuma sila si Talisay City Mayor Eduardo Gullas ingon man ang iyang konseho sa buhatan sa Visayas-Ombudsman. Kini may kalabutan sa yuta nga giugmad sa Box Hill nga kompaniya nga gitukuran na og mga panimaye.

Ang chairman sa Linao, Mohon, Pooc Association (LIMOPOCA) nga si Dodong Eleuterio niduso og reklamo tungod kay wala nakaisyu og cease and desist order ang pamunuan ni Gullas sa nagpadayon nga development sa Box Hill.

Ang yuta giingong ubos sa irrigation ug agricultural land.

Apan si Bise Mayor Alan Bucao nipadayag nga sa ilang pakisusi sa mga dokumento nga giduso sa taga Box Hill ilang nakita nga kompleto kini sa rekisitos.

May papeles sab sila nga nagmatuod nga dry land ang maong yuta nga gipasabot ni Eleuterio.

Gawas niini dugay na nga naangkon sa Box Hill ang maong luna ug ang niaging konseho ang nitugot nga hatagan og development permit ang Box Hill tungod kay naa ang tanang rekisitos.

Si Eleuterio ang giingong sinaligan ni Konsehal Doroteo Emit nga ilang kauban ug maoy nakapasakit sa ilang buot. Nakapangutana si Bucao nganong karon pa gipasaka ang reklamo. (BANAT NEWS)