Manghod sa kapitan sikop sa drug bust sa PDEA-7

CEBU, Philippines - Gipasanginlang “major drug player” sa lungsod sa Cordova nga gikatahong  igsuon sa barangay kapitan ang gisikop sa mga sakop sa Philippine Drug Enforcement Agency Biyernes sa gabii diha sa may Brgy Cogon sa maong lungsod.

Ang nasikop naila nga si Stephen Baguio Ando, 34, giingong nagpaila nga manghod ni Kapitan Francisco Ando Jr. sa Brgy. Cogon sa maong lungsod.

Matud pa ni Leia Albiar tigpamaba sa PDEA 7, ang dinakpan  usa ka major drug player kay kini sumala pa sa ilang nahipos nga impormasyon makabaligya og tunga sa kilo nga drugas matag semana.

Sumala pa ni Albiar, nasikop nila si Ando human kini nibaligya og  usa ka putos nga shabu ngadto sa ilang ahente nga gihimong poseur buyer balig P200.

Gitug-an ni Albiar nga ang ilang operasyon gipangulohan mismo sa ilang rehiyonal nga direktor nga si Yogi Filemon Ruiz  ug nakuha ang 186 ka putos sa gituohang shabu nga mobalor og 250 gramos nga mokantidad og P635 mil base sa Dangerous Drug Board value.

Samtang si Kapitan Ando sa iyang bahin nidangop sa Cordova Police Station aron sa pagpa blotter sa nahitabo sa iyang manghud nga gisikop sa mga sakop sa PDEA.

Matud pa ni Police Officer 3 Reynante Marabable, desk officer sa Cordova Police, nidangop sa ilang buhatan si Kapitan Ando alas 6:30 sa hapon nga diin gidakop ang iyang manghod alas singko kapin sa hapon sa mga sakop sa PDEA sulod sa panimalay sa ilang amahan nga Francisco Ando Sr. nga walay gipakita nga mga dokumento sa pagdakop.

Sumala pa ni Marabable, nasagmuyo ang kapitan tungod kay walay gipakita nga mga papeles ug wala nakig-alayon sa mga opisyal sa barangay ug nangaguba pa ang cabinet sa amahan niini human gidakop ang igsuon niini sa mga sakop sa PDEA nga nagsakay og duha ka mga van.

Samtang gibanabanang P283,200 nga shabu ang nakuha sa mga operatiba sa Provincial Intelligence Branch (PIB) ug Consolacion Police Station niadtong Biyernes sa gabii sa ilang gipahigayon nga buy-bust operation sa Brgy. Lamac, Consolacion.

Nadakpan nila si Bryan Pepito, residente sa maong lugar human sa transaksyon sa drugas ug nakuhaan kini og 41 ka gagmay nga pakete, usa ka medium size nga pakete, ug tulo ka dagkong putos nga pulos may sud nga gidudahang shabu.

Ang tanan nitimbang og 24 gramos, nakuha usab ang  P200 buy-bust money ug P200 gituohang halin niini sa illegal drugs.

Samtang nadakpan usab diha sa Brgy. Tayud sa Consolacion ang managsuon nga gidudahang  namaligya og drugas samtang nakaeskapo ang ilang kauban sa buy-bust operation. Si  Police Officer 1 Ritchie Guilleran miila sa ilang nadakpan nga mao si Nico Tan, alyas Loloy, ug ang manghod niini nga si James pulos nagpuyo sa maong dapit.

Matud pa ni PO1 Guilleran nga nakaeskapo si Arman Arnais nga kauban sa duha kay nakabantay dayon kini nga mga polis ang ilang gikaatubang ug daling nikaratil sa pagdagan.

Nakuha gikan sa magsuon ang unom ka paketeng shabu ug P200 nga buy-bust money. (BANAT NEWS)