Dugang tabang sa nasunugan

CEBU, Philippines - Susihon pa sa kagamhanan sa siyudad sa Sugbo kun unsay matabang nila sa pamilya sa duha ka bata nga namatay sa nahitabong sunog sa Sitio Hillside, Brgy. Talamban kagahapon sa buntag. Kini ang gipahibawo ni Leah Japson, ang pangulo sa Cebu City Social Welfare and Development (CSWD). Hinoon, si Mayor Tomas Osmeña nipasalig nga mohatag gyud ang siyudad og hinabang alang niadtong mga apektado sa sunog ilabi na sa pamilyang namatyan.

 Nasuta nga 41 ka pamilya ang apektado nga gilangkuban sa kapin usa ka gatos ka indibidwal ug matud ni Japson, makadawat sila og P10 mil nga hinabang. Paghuman sa sunog nanghatag sab ang siyudad og pagkaon sa mga biktima nga kasamtangang gipahiluna sa tunghaan. Nang-apod-apod usab sila og disaster kit nga nagkantidad og P2 mil. Dugang ni Japson, manghatag usab sila og housing materials aron makatukod og balik ang mga nasunugan kay matud pa, ila ang luna nga gitarukan sa ilang mga panimalay nga nasunog.

 Ang pangulo sa Cebu City Disaster Risk Reduction Management Office (CDRRMO) Nagiel Bañacia niingon nga nihimo sila og assessment uban ang barangay aron masuta kun mahimo ba’ng padak-an ang lugar. Nasayran nga naglisod og sulod ang mga bombero sa dapit tungod sa kahagip-ot sa dalan. (BANAT NEWS)