95% sa mga piniriso gihusay pa

CEBU, Philippines - Kadaghanan sa mga piniriso ang padayon pang gihusay ang ilang mga kaso samtang gamay ra ang nahukman na ug nakombikto.

Gibutyag ni Senior Supt. Hilbert Flor, regional director sa Bureau of Jail Management and Penology-7, nga 95.37 porsiyento o 11, 076 ang gihusay pa ang kaso samtang 4.63 porsiyento o 537 lang ang nahukman na.

Atol sa Provincial Peace and Order Council meeting, si Flor nagkanayon nga nagkadaghan na ang mga priso sa nagkadaiyang prisohan gumikan kay mas daghan ang nasulod itandi sa mga nakagawas.

Gisanglitanan ni Flor sa buwan sa Agosto diin 902 ang nasulod apan 527 lang ang nakagawas.

Nakapadaghan sa mga piniriso ang subsob nga kampanya sa kapolisan batok sa ilegal nga drugas.

Gikan sa tuig 2014 hangtud 2016, niabot lang sa 675 ang napagawas nga piniriso pinaagi sa Good Conduct Time Allowance (GCTA) nga programa diin ang mga magbinut-an sulod sa prisohan mapaubsan ang adlaw sa ilang pagpuyo. Ang kahuot sa mga prisohan ang usa sa hinungdan nga nangasakit ang mga piniriso.

Sa report ni Flor, upat ka sakit ang kasagaran moigo sa mga piniriso sama sa cardiac arrest, pneumonia, tuberculosis ug cerebrovascular accident.

Nisaka usab ang kaso sa HIV cases sa mga piniriso.

Ang pagtukod og dugang prisohan mao karon ang gihimo sa kadagkuan sa BJMP sama sa Naga City Jail, Carcar City Jail ug Mandaue City Jail-male dorm annex samtang nagpaabot usab ang ahensiya sa idonar nga luna  alang sa pagtukod pa og dugang pasilidad sa Lungsod sa Tuburan, Asturias ug Carmen. (BANAT NEWS)