Pagkaon og brown rice gidasig sa DA

CEBU, Philippines - Mahimong beneficiary ang mga charitable institutions niining labing bag-ong programa sa Department of Agriculture (DA) nga gitawag og Brown4good Challenge.

Matud pa ni Joel Elumba, ang Regional Technical Director sa DA7 nga ilang gilusad ang upat ka kaayohan kun mokaon og Brown Rice, kini ang alang sa lawas, alang sa nasud, alang sa mag-uuma ug alang sa mga kabus. Gihimo nila kining maong hagit isip pagsabwag sa kaayuhan kun mokaon og Brown Rice, pinaagi sa pagamit sa hashtag #BROWN4good challenge, diin matag kaon og luto nga brown rice i-post kini sa mga nagkadaiyang social networking site sama sa Facebook, Twitter o Instagram.

 Dugang ni Elumba nga matag hashtag kinahanglan ubanan og hashtag kun asa nga rehiyon kay sa matag post adunay usa ka cup nga Brown Rice nga idonar sa charities nga mapilian.

Gawas sa pag-post sa #BROWN4good #Region, kinahanglan i-tag sab ang mga kaila o higala sa social networking site aron muabot sa target nga hashtag. Gipadayag niini nga daghang makuha gikan sa brown rice sama sa pagpakubos sa diabetes, taas ang fiber, makatabang sa pagpaubos sa timbang, pagpaubos sa cholesterol ug uban pa.

 Gipasalig ni Elumba, nga aduna silay igong suplay sa brown rice nga gikan sa Bohol Rice Processing Complex ug tinguha nila karon nga adunay mga center nga mapalitan sa katawhan sa dakbayan sa Sugbo ug silingang mga lugar. (BANAT NEWS)