Sa Negros na nagtago-tago
CEBU, Philippines - Naabot sa isla sa Negros ang mga opisyal sa Cebu Provincial Detention and Rehabilitation Center (CPDRC) sa pagpangita sa mi-eskapo nga si Arnel Mait gikan sa maong pasilidad niadtong Lunes.
Nakadawat sila og taho nga nakalarga kini kay adunay balay ang iyang amahan sa lungsod sa Calatrava sa Negros Occidental.
Matud ni Marco Toral ang consultant on jail matters sa CPDRC nga ala una sa kaadlawon kagahapon sila nanglarga ni jail warden Romeo Manansala uban ang laing duha ka opisyal sa provincial jail. Nadawat nila ang maong impormasyon niadtong Biyernes sa gabii.
Dugang ni Toral nga posibleng nisakay si Mait sa dakbayan sa Toledo o sa lungsod sa Tabuelan kun asa adunay pantalan padulong sa isla sa Negros.
Sa dihang ilang giadto ang gitumbok nga nahimutangan ni Mait, negatibo kini ug wala nila masakpi.
Mag-usa ka semana na sukad nakasibat si Mait gikan sa CPDRC human kini nagpaka-aron-ingnon nga dalaw hinungdan nga nakasibat.
Tungod sa iyang pag-eskapo, nagpabilin ang pag-suspenso una nga makadawat og dalaw ang uban pa niyang piniriso sa provincial jail. (BANAT NEWS)
- Latest
