Duha sikop sa kalapasan sa election gun ban
CEBU, Philippines - Natanggong ang duha ka lalaki human nasikop sa managlahing operasyon sa kapolisan sa Lungsod sa Carmen ug Dakbayan sa Danao tungod sa paglapas sa election gun ban niadtong Biyernes.
Nasikop atol sa checkpoint sa National Highway, Dawis Norte, Lungsod sa Carmen niadtong Biyernes sa gabii si Edgardo Laping, 37, adunay kapuyo ug molupyo sa Sitio Mang-aljo, Barangay Ipil sa maong lungsod.
Matud ni Senior Police Officer 3 Danilo Laurente, desk officer sa Carmen Police Station, nga atol sa pagpara sa kapolisan sa suspek, nisuway kini og ikyas apan nagukdan.
Sa pagkapkap na sa kapolisan nasakmit ang usa ka Swiss and Wesson kalibre .38 revolver, usa ka .9mm nga bala sulod sa U-box sa motor, usa ka Swiss and Weeson kalibre .357 revolver nga adunay .38 kalibre nga bala, usa ka kalibre .357 ug duha ka kalibre .38 nga wala pa mapabutong bala.
Sa laing bahin, usa sab ka lalaki ang nadakpan sa Sabang, Dakbayan sa Danao human kini nagwara-wara og armas nga nihimo og kagubot sa maong dapit.
Ang nasikop naila nga si Junrey Capuyan, 35, walay trabaho ug residente sa nahisgutang dapit.
Matud ni Police Officer 3 Roselo Campo sa Danao City Police Station nga usa ka impormante ang nitaho kanila kabahin sa usa ka lalaki nga nagwara-wara og armas sa ilang dapit.
Pag-abot sa kapolisan, nakuha sa posisyon sa suspek ang kalibre .22 revolver nga armas nga adunay tulo ka bala. (BANAT NEWS)
- Latest