P747M proyekto napatuman ni Davide

CEBU, Philippines - Ang kagamhanan sa probinsiya sa nilabay’ng duha ug tunga ka tuig nakapagawas og P747 milyones nga pundo alang sa implementasyon sa nagkalain-laing programa sa kalungsuran ug siyudad.

Kini ubos sa programa sa Kapitolyo nga “Kalambuan sa Matag Sugbuanon.”

Sa pito ka distrito, ang ikalimang distrito ang nag-una nga nikabat sa P230.4 milyones sunod ang ikaduhang distrito nga may P2012.2 milyones; ikatulong distrito, P129.1 milyones; ikaunom nga distrito, P748 milyones; ikaupat nga distrito, P66.2 milyones.

Ang Lungsod sa Poro ug Pilar sa ikalimang distrito ang nakadawat og P27.3 milyones ug P24.1 milyones; samtang ang Lungsod sa Sogod nakadawat og P26.3 milyones.

Lakip sa proyekto nga giimplementar sa Lungsod sa Pilar ang road rehabilitation ug concreting, circumferencial freeway nga nagkantidad og P15 milyones ug nakadawat usab sila og P3 milyones sa pag-ayo sa kadalanan sa lungsod nga naguba sa bagyong Yolanda niadtong 2013.

Sa Poro ang dakung pahat sa nadawat nilang pinansiyal nga hinabang gigahin ngadto sa inprastraktura ug countryside development projects lakip na ang road and bridge repair            nga nikabat sa P4.9 milyones.

Ang Poro nigahin usab og P2 milyones alang sa rehabilitation ug expansion sa ilang municipal building; P3 milyones sa reclamation project; P2.5 milyones alang sa heavy equipment ug P2 milyones sa renovation sa public market.

Sa Lungsod sa Tuburan, ang Kapitolyo nihatag og P15 milyones sa pagsemento sa portion sa farm-to-market road sa Alegria-Cabangcalan.

Nikabat usab sa P9 milyones ang na-download sa probinsiya ngadto sa lungsod alang gihapon sa farm-to-market road sa Cabangcalan ug Cogon-Alegria roads.

Sa kauswagan sa ekonomiya ug turismo sa amihanan, ang kagamhanan sa probinsiya nihatag og P15 milyones alang sa renovation sa Polambato Port sa Dakbayan sa Bogo.

Ang Bogo nakadawat usab og P7 milyones nga hinabang alang sa road opening sa relocation sites ug uban pang infrastructure projects.

Ang Lungsod sa Consolacion nakadawat og pinansiyal nga hinabang alang sa pagsemento sa Sacsac road nga nikabat sa P6 milyones; construction sa ilang drainage system ug pag-ayo sa Jugan-Tayod road, P5 milyones.

Ang Lungsod sa Cordova nakadawat usab og P8 milyones nga hinabang alang sa construction sa coastal road diin ang mga mananagat nihangop niini tungod kay duna na silay tarung nga karsada.

Ang Kapitolyo nihatag usab og hinabang ngadto sa kalungsuran alang sa rehabilitation ug construction sa waterworks system.

Ang Lungsod sa Alcoy nakadawat og P5 milyones alang sa ilang waterworks system; P3.7 milyones sa Santander; P1.5 milyones sa Dakbayan sa Carcar; P3 milyones sa Tabuelan; P3.5 milyones sa Sogod; ug P3 milyones sa Tudela. (BANAT NEWS)