Laing puya gisulod og plastik

CEBU, Philippines - Human nakit-an ang usa ka bata nga bag-o pa lang natawo nga gisulod sa paper bag ug gibilin atubangan sa usa ka tindahan sa Dakbayana sa Lapu-Lapu, laing fetus na sab ang nakit-ang gilabay nga gisulod sa selopin sa kasagbutan nga bahin sa Sitio Coles, Barangay Quiot, Dakbayan sa Sugbo pasado alas 2 sa nakalabay nga hapon.

Ang fetus gibana-bana nga anaa sa lima hangtud unom ka buwan nga gituohang gilabay sayo sa buntag sumala pa ni Senior Police Officer 2 Rommel Bancog, imbestigador sa homicide section sa Cebu City Police Office.

Usa ka Ricky James Embalzado, 20, nagpuyo sa mao’ng dapit, ang una’ng nakakita sa fetus diha’ng kini nitubag sa sugo sa lawas.

Nagduda si Bancog nga lagmit sayo sa buntag pa kini gilabay kay wala man nadugta ang lawas sa fetus.

Dihang gisusi sa Cebu City Emergency Medical Service (CCEMS), matud ni Erileh Morales, usa sa mga paramedics, nga wala na’y kinabuhi ang puya hinungdan nga gidala nila sa St. Francis Funeral Homes alang sa tarung nga paglubong. (BANAT NEWS)